एमाले कार्यालयको जग्गा विवादसम्बन्धी मुद्दा हेर्न नभ्याइनेमा

काठमाडौं । भाटभटेनीका सञ्चालक मिनबहादुर गुरुङले नेकपा एमालेको पार्टी कार्यालय निर्माणका लागि दिएको जग्गादानसम्बन्धी मुद्दा हेर्न नभ्याइनेमा परेको छ ।

मंगलबार रिटको पेसी न्यायाधीशद्वय सपना प्रधान मल्ल र अब्दुल अजिज मुसलमानको संयुक्त इजलासमा परेको थियो ।

यसअघि आइतबार उक्त मुद्दा प्रधानन्यायाधीश प्रकाशमान सिंह राउतसहितको इजलासमा पेसी परेकोमा सो दिन पनि हेर्न नभ्याइनेमा परेको थियो ।

अधिवक्ता ज्ञानबहादुर बस्नेतले गुरूङ र एमाले पार्टी कार्यालयलाई विपक्षी बनाएका थिए । उनले रिटमा भ्रष्टाचार र सरकारी जग्गा व्यक्तिगत बनाउने अभियोग लागेका व्यवसायीबाट पार्टीले जग्गा दान लिने विषय कानूनको मर्मविपरीत भएको जिकिर गरेका थिए ।

भाटभटेनी सुपरस्टोरका सञ्चालक गुरुङले गत असोज २५ गते काठमाडौंको कीर्तिपुर-२, मैत्रीनगरमा नेकपा एमालेलाई केन्द्रीय कार्यालय भवन बनाउन १० रोपनी १४ आना जग्गा दिएको घोषणा गरेका थिए । एमाले अध्यक्ष केपी शर्मा ओली र गुरुङ दम्पतीले भवनको शिलान्यास समेत गरेका थिए ।