पत्रकार महासंघ झापामा पुनः गिरी निर्वाचित

झापा, २९ मंसिर । नेपाल पत्रकार महासंघ झापा शाखाको अध्यक्षमा एकराज गिरी पुनः निर्वाचित हुनुभएको छ ।

शुक्रबार भएको निर्वाचनको गएराति आएको अन्तिम मत परिणाम अनुसार गिरी एक सय ३१ मतका साथ विजयी हुनुभएको निर्वाचन अधिकृत शिरो सान्दाइले जानकारी दिनुभयो । अध्यक्षका प्रत्यासी डिकेश लामाले ३४, राजेन्द्र गौतमले ३४ र टीकराम नेतीले चार मत ल्याउनुभएको छ ।

त्यस्तै, उपाध्यक्षमा सुब्रत न्यौपाने एक सय २२ मतका साथ निर्वाचन हुनुभएको छ । उपाध्यक्षका प्रत्यासी गणेशमान मुखियाले ८१ मत ल्याउनुभयो । सचिवमा प्रदीप परियार र राजु पाठकले समान ९९ मत ल्याएर निर्वाचित हुनुभएको छ ।

यस्तै, खुला सहसचिवमा रमेश तिवारी र दलित सदस्यमा मनकुमार गदाल सर्वसम्मत निर्वाचित भइसक्नुभएको थियो । महासंघको समावेशी सहसचिवमा तिलक योञ्जन एक सय ११ मतका साथ निर्वाचित हुनुभएको छ भने उहाँका निमकतम् प्रतिद्वन्द्वी चिरञ्जीवी घिमिरेले ८३ मत प्राप्त गर्नुभयो ।

यसैगरी, कोषाध्यक्षमा मुक्ति पौडेल ९९ मत ल्याएर निर्वाचित हुनुभएको छ । कोषाध्यक्षका प्रत्यासी पुष्पलाल खड्काले ५४ र शम्भुजित दाहालले ४६ मत प्राप्त गर्नुभएको छ ।

महासंघको २० सदस्यीय कार्यसमितिको महिला सदस्यमा भूमिका सुब्बाले एक सय १२, सन्तोष शर्मा एक सय, आदिवासी जनजाति सदस्य इन्द्रकुमार राई एक सय १०, खुला सदस्यमा अस्मिता साँखी एक सय ४८, इशा प्रधान एक सय ३५, स्वस्तिका आचार्य एक सय ३३, विनोद पाण्डे एक सय ३३, सुदीप अधिकारी एक सय २६, द्रोण अधिकारी एक सय २८, दिपेश राजवंशी एक सय १७, देवेन्द्र प्रसाईं ९५ र भूमिराज पराजुली ९४ मतका साथ निर्वाचित भएको निर्वाचन समितिले जनाएको छ ।

पत्रकार महासंघ झापा शाखामा दुई सय २० सदस्य रहेकोमा दुई सय पाँच जनाले मतदान गरेका थिए । २० सदस्यीय कार्यसमितिको १८ पदका लागि ३६ जनाले उम्मेदवारी दिएका थिए ।

The post पत्रकार महासंघ झापामा पुनः गिरी निर्वाचित appeared first on Jhapa Online.