मोटरसाइकलको ठक्करबाट पैदलयात्रीको मृत्यु

काठमाडौं ।

भक्तपुरमा मोटरसाइकलले ठक्कर दिँदा पैदल यात्रीको मृत्यु भएको छ। प्रहरीका अनुसार मृत्यु हुनेमा रामेछाप दोरम्बा गाउँपालिका वडा नम्बर ४ घर भई सूर्य विनायक नगरपालिका वडा नम्बर १० बस्दै आएका ७० वर्षीय निमबहादुर मगर रहेका छन्।

सूर्य विनायक नलिन्चोक जोरपाटीमा जगातीबाट साँगातर्फ जाँदै गरेको बा४६प ११२७ नम्बरको मोटरसाइकलले शनिबार  राति ठक्कर दिँदा मगर गम्भीर घाइते भएका थिए।

उनलाई उपचारको लागि मध्यपुर अस्पताल ठिमी भक्तपुर लगिएकोमा राति पौने १० बजे मृत्यु भएको भक्तपुर परिसर प्रवक्ता प्रहरी नायब उपरीक्षक ढुण्डीराज न्यौपानेले बताए।

मोटरसाइकल र चालक काभ्रे जिल्ला बनेपा नगरपालिका वडा नम्बर ६ का ४४ वर्षीय जितेन्द्र श्रेष्ठलाई प्रहरी वृत्त जगातीले नियन्त्रणमा लिएको छ।