निसान पदयात्रीलाई स्वागत गर्न तम्तयार माईजोगमाईको हात्तीटार

रोशन काफ्ले
माईजोगमाई, २० पुस । माइजोगमाई गाउँपालिका वडा ४ ले निसान पदयात्रीको व्यवस्थापनका लागि विभिन्न्न तयारी गरिरहेको छ । आफ्नो भूभागमा पर्ने पदमार्गको सरसफाइ र सबै पूर्वाधार तयार गरिएको हो ।

पदयात्रीलाई खाने–बस्ने व्यवस्थापन, स्थानीय वेशभूषासहितको झाँकी प्रदर्शनलगायतको तयारी भएको स्थानीय सुरेश भट्टराईले जानकारी दिए । वडाध्यक्ष डुरन देवान संयोजकत्वमा पदयात्राको स्थानीय व्यवस्थापन समितिसमेत गठन गरिसकिएको छ ।

पुस २४ देखि २६ सम्म निसान पदयात्रा हुँदैछ । नेपाल एकीकरणताका तत्कालीन श्रीनाथ पल्टनले पूूर्वी सीमा विजय गरेर नागरीगढीमा गाडिएका निसान फर्काइएको बाटोको संरक्षण गर्दै निसान पदयात्राको तयारी गरिएको हो ।

यसरी गाढिएका निसान सुगौली सन्धीपछि फर्काएर ल्याइएको थियो । फर्काएर ल्याउँदा बाटामा छोटो र लामो अवधि राखिएका स्थानलाई जोडेर निसान पदयात्रा तयारी गरिएको हो । नेपाल–भारत पूर्वी सीमा मेचीबजारबाट २४ गते बिहान पदयात्रा शुभारम्भ गरिने पदयात्रा आयोजक समितिले जनाएको छ ।
करिब सय जना सहभागी हुने पदयात्रा निसान ल्याएर राखिएको अर्को स्थान करफोकको पूर्णेडाँडामा त्यस दिन आउने छ । पुस २५ मा पूर्णेडाँडामा पदयात्राको औपचारिक उद्घाटन गरिनेछ । उद्घाटनपछि पुनः सुरु भएको पदयात्रा निसान राखिएको अर्को स्थान माइजोगमाईको नामासालिङस्थित हात्तीटार आउनेछ ।

२६ गते बिहान नामसालिङ हात्तीटारबाट पुनः सुरु भएको पदयात्रा माइबेनी हुँदै अहिले निसान र तोप राखिएको इलाम सदरमुकामस्थित माइस्थानमा आउनेछ ।इलाम नगरपालिका, सूर्योदय नगरपालिका र माइजोगमाई गाउँपालिकाले संयुक्त रूपमा पदयात्रा आयोजना गरेका हुन् । निसान पदमार्ग ४१.१ किलोमिटरको छ ।

The post निसान पदयात्रीलाई स्वागत गर्न तम्तयार माईजोगमाईको हात्तीटार appeared first on Jhapa Online.