डा.भूसालले पाए प्राधिकरणमा कार्यकारी प्रमुखको जिम्मेवारी

काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणका सहसचिव डा. भीष्मकुमार भूसालले प्राधिकरणको कार्यकारी प्रमुखको जिम्मेवारी पाएका छन् ।

माघ ४ गतेको गृहमन्त्रीस्तरीय निर्णयअनुसार डा. भूसालले अर्को व्यवस्था नभएसम्मका लागि प्राधिकरणको कार्यकारी प्रमुखका रूपमा कामकाज गर्ने गरी जिम्मेवारी पाएका हुन् ।

विपद् जोखिम न्यूनीकरण तथा व्यवस्थापन नियमावली, २०७६ को नियम ५ (ग) बमोजिम डा. भूसाललाई कार्यकारी प्रमुखको जिम्मेवारी दिइएको बताइएको छ ।

कार्यकारी प्रमुख अनिल पोखरेलको कार्यकाल पुस १ गतेबाट समाप्त भएको थियो ।