प्रेस सेन्टर नेपालको प्रदेश अधिवेशन : पत्रकार र सञ्चार गृहलाई सबल बनाउनुपर्नेमा जोड

विराटनगर, ११ माघ । प्रेस सेन्टर नेपालको तेस्रो प्रदेश अधिवेशन अन्तरगत आज उद्घाटन सत्र सम्पन्न भएको छ । 

मोरङको विराटनगरमा प्रदेश अध्यक्ष विनोद घिमिरेको अध्यक्षता तथा सेन्टरका केन्द्रीय वरिष्ठ उपाध्यक्ष कमल गिरीको प्रमुख आतिथ्यमा प्रदेश अधिवेशन सम्पन्न भएको हो । 

प्रमुख अतिथि वरिष्ठ उपाध्यक्ष गिरी पत्रकारले समाचार मात्र नभएर समाज परिवर्तनमा भूमिका खेल्नुपर्ने बताउनुभयो । प्रेस सेन्टर कान्छो संगठन भए पनि दर्बिलो र ओझ पूर्ण संगठन भएको बताउनुभयो । 

कार्यक्रममा सहभागी वक्ताहरुले पत्रकारिताको गरिमा उच्च बनाउँदै पत्रकार र सञ्चार गृहलाई सबल बनाउनुपर्नेमा जोड दिनुभयो ।

पूर्वमन्त्री एवम नेकपा माओवादी केन्द्र प्रदेश सचिव गणेश उप्रेती प्रेस सेन्टर समाजवादी यात्रामा अघि बढेको संगठन भएको बताउनुभयो । समाजवादी उद्देश्यलाई केन्द्रमा व्यावसायिक पत्रकारिता गर्न उहाँले आग्रह गर्नुभयो ।

डिजिटल युगमा पत्रकारिता चुनैती थपिएको बताउँदै नेकपा माओवादी केन्द्र प्रदेश फ्याक्सन इञ्चार्ज विजय साम्पाङ्गले प्रदेश अधिवेशन त्यो चुनौति चिर्नुपर्नेमा जोड दिनुभयो । 

पत्रकार महासंघ केशी प्रदेश महासचिव हेमा चेम्जोङले सबै पत्रकार र सञ्चार गृहलाई सबल बनाउन महासंघले पहल थालिसकेको बताउनुभयो । 

कार्यक्रममा प्रेस सेन्टरकी केन्द्रीय उपाध्यक्ष गंगा बराल, लक्ष्मण खड्का, प्रेस युनियनका प्रदेश अध्यक्ष मिनकुमार नवोदित, समाजवादी प्रेस संगठन प्रदेश अध्यक्ष बन्धु पोखरेल लगायतले शुभकामना मन्तव्य राख्नुभएको थियो ।

कार्यक्रममा वरिष्ठ उपाध्यक्ष नवराज कट्टेलले स्वागत मन्तब्य राख्नु भएको थियो भने सञ्चालन महासचिव सुजन तिम्सिनाले गर्नुभएको थियो ।

अब अधिवेशनको बन्द सत्रले आगामी तीन वर्षे कार्यकालका लागि नयाँ नेतृत्व चयन गर्ने छ । सर्वसम्मत रुपमा नयाँ नेतृत्व चयनका लागि प्रयास भइरहेको छ । 

The post प्रेस सेन्टर नेपालको प्रदेश अधिवेशन : पत्रकार र सञ्चार गृहलाई सबल बनाउनुपर्नेमा जोड appeared first on Jhapa Online.