संसद्को हिउँदे अधिवेशनको अन्तिम बैठक बस्दै, यस्तो छ सम्भावित कार्यसूची

काठमाडौं । संसद्को हिउँदे अधिवेशन आज (मङ्गलबार) देखि अन्त्य हुँदैछ । आज अन्तिम बैठक बस्न लागेको छ ।

बैठक नयाँ बानेश्वरस्थित संसद् भवनमा बिहान ११ बजे सुरु हुने संसद् सचिवालयले जनाएको छ ।

आजको बैठकमा प्रधानमन्त्री केपी शर्मा ओलीले निम्नलिखित वार्षिक प्रतिवेदनहरू पेस गर्नेलगायत सम्भावित कार्यसूची रहेका छन् ।

जसमा राष्ट्रिय समावेशी आयोगको छैटौं वार्षिक प्रतिवेदन तथा मुस्लिम आयोगको छैठौं वार्षिक प्रतिवेदन पेस गरिने छ ।

यस्तै संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपाल हवाई सेवा प्राधिकरण विधेयकमाथि विचार गरियोस् भन्ने प्रस्ताव प्रस्तुत गर्ने कार्यसूची छ ।
साथै उनले नेपाल नागरिक उड्डयन प्राधिकरण विधेयक, २०८१ माथि पनि विचार गरियोस् भन्ने प्रस्ताव प्रस्तुत गर्नेछन् ।

यसैगरी उपप्रधान एवं अर्थ मन्त्री विष्णुप्रसाद पौडेलले ‘बैङ्किङ कसूर तथा सजाय विधेयकमाथि राष्ट्रियसभाबाट भएको संशोधनमाथि विचार गरियोस् भन्ने प्रस्ताव प्रस्तुत गर्ने कार्यसूची तय छ ।

त्यस्तै शिक्षा, विज्ञान तथा प्रविधि मन्त्री विद्या भट्टराईले शिक्षा, स्वास्थ्य तथा सूचना प्रविधि समितिको प्रतिवेदन सहितको शहीद दशरथ चन्द स्वास्थ्य विज्ञान विश्वविद्यालय विधेयकमाथि छलफल गरियोस् भनी प्रस्ताव प्रस्तुत गर्नेछिन् ।

साथै उनले शहीद दशरथ चन्द स्वास्थ्य विज्ञान विश्वविद्यालय विधेयकलाई पारित गरियोस् भनी प्रस्ताव प्रस्तुत गर्ने कार्यसूचीसमेत छ ।

त्यसैगरी ऊर्जा, जलस्रोत तथा सिँचाईमन्त्री दिपक खड्काले पूूर्वाधार विकास समितिको प्रतिवेदन सहितको जलस्रोत विधेयकमाथि छलफल गरियोस् भनी प्रस्ताव प्रस्तुत गर्ने कार्यसूची छ ।

यस्तै उनले जलस्रोत विधेयकलाई पारित गरियोस् भनी प्रस्ताव पनि प्रस्तुत गर्ने कार्यसूची छ ।

सरकारले चालु हिउँदे सङ्घीय संसद्को दुवै सदनको हिउँदे अधिवेशन अन्त्य गर्न राष्ट्रपतिसमक्ष सिफारिस गर्ने निर्णय गरेको छ । सोमबार अबेर बसेको मन्त्रिपरिषद् बैठकले अधिवेशन चैत्र १९ गते मङ्गलवार राति १२ बजेदेखि अन्त्य गर्न राष्ट्रपति समक्ष सिफारिस गर्ने निर्णय गरेको हो ।

सूचना तथा सञ्चारमन्त्रीसमेत रहेका सरकारका प्रवक्ता तथा पृथ्वीसुब्बा गुरुङले अधिवेशन अन्त्यको निर्णय भएको बताएका हुन् ।

सभामुख देवराज घिमिरेले मङ्गलवार दिउसो ११ बजेको प्रतिनिधिसभा बैठक बस्ने जानकारी दिएका थिए ।

गएको १८ माघमा संसद्को हिउँदे अधिवेशन सुरु भएको थियो । सोमबार मात्र सरकारले ल्याएका ६ मध्ये पाँचवटा अध्यादेशको ’प्रतिस्थापन विधेयक’ राष्ट्रियसभाबाट पारित गरेर राष्ट्रपतिले प्रमाणीकरण गरेसँगै सरकारले हिउँदे अधिवेशनको अन्त्य गरेको हो ।

संविधानको धारा ९३ अनुसार संसद् अधिवेशनको आह्वान र अन्त्य मन्त्रिपरिषद्को सिफारिसमा राष्ट्रपतिले गर्ने व्यवस्था रहेको छ ।