विद्युत् प्राधिकरणको श्वेतपत्र सार्वजनिक कार्यक्रम स्थगित

काठमाडौं  । नेपाल विद्युत् प्राधिकरणले आज गर्ने भनिएको श्वेतपत्र सार्वजनिक कार्यक्रम स्थगित भएको छ। प्राधिकरणका कार्यकारी निर्देशक हितेन्द्रदेव शाक्यको सचिवालयले एक सूचना जारी गर्दै प्राविधिक कारणवश कार्यक्रम स्थगित गरिएको जानकारी दिएको हो।

सरकारद्वारा बर्खास्त गरिएका कुलमान घिसिङको कार्यकालमा भएका आर्थिक तथा प्राविधिक लगायतका विवरणहरू समेटिएको श्वेतपत्र आज दिउँसो सार्वजनिक गर्ने तयारी प्राधिकरणको थियो।

सचिवालयले अर्को जानकारी नआएसम्मका लागि कार्यक्रम स्थगित गरिएको जनाएको छ। श्वेतपत्र कहिले सार्वजनिक हुन्छ भन्ने बारेमा प्राधिकरणले थप विवरण दिएको छैन।