भारतले केही घण्टामा आक्रमण गर्ने सूचना पाएको पाकिस्तानी मन्त्रीको दाबी

पहलगाम हमलापछि भारत र पाकिस्तानबीच बढेको तनाव र टकरावको आशंकाको बीचमा विश्वका धेरै देशहरूले संयम अपनाउन आह्वान गरेका छन् । सोमबार चीन, अमेरिका, टर्की र कतारले  भारत र पाकिस्तानले तनाव कम गर्नेछन् आशा व्यक्त गरेका थिए । यद्यपि, विगत केही दिनदेखि दुवै देशका सेनाबीच नियन्त्रण रेखा (एलओसी) मा गोलीबारी पनि भएको छ ।

यी सबैको बीचमा प्रश्न उठिरहेको छ कि के भारत र पाकिस्तान युद्धको नजिक उभिएका छन् र के भारतले आगामी केही दिनमा पाकिस्तानमाथि कुनै प्रकारको कारबाही गर्न सक्छ ?

यस्तै संकेत पाकिस्तानका रक्षामन्त्री ख्वाजा आसिफले आफ्नो पछिल्लो बयानमा दिएका छन् । त्यसपछि बुधबार बिहान पाकिस्तानका सूचना मन्त्री अताउल्लाह तरारले एक बयान जारी गर्दै भारतले आगामी २४ देखि ३६ घण्टाभित्र पाकिस्तानमाथि आक्रमण गर्न सक्ने बताएका छन् । भारतको सम्भावित आक्रमणबारे बयान बुधबार बिहान आएको हो । तरारले आफ्नो एक्स खातामा एक भिडियो पोस्ट गरे र त्यसलाई उर्दूमा पनि पोस्ट गरे ।

सोमबार समाचार एजेन्सी रोयटर्सलाई दिएको अन्तर्वार्तामा ख्वाजा आसिफले भने, ‘हामीले हाम्रो सेनाको तैनाथी बढाएका छौं, किनभने केही यस्तो कुरा छ जुन अब तत्काल हुन सक्छ । यो अवस्थामा केही रणनीतिक निर्णयहरू लिनुपर्ने छ र ती निर्णयहरू लिइसकिएको छ ।’ ख्वाजा आसिफले यो पनि भने कि पाकिस्तानको सेनाले सरकारलाई भारतबाट आक्रमणको सम्भावनाबारे सचेत गराएको छ ।

यो अन्तर्वार्तामा ख्वाजा आसिफले यो पनि भने कि यदि पाकिस्तानको अस्तित्वमाथि प्रत्यक्ष खतरा हुन्छ भने मात्र पाकिस्तानले आणविक हतियारको प्रयोग गर्नेछ । ख्वाजा आसिफले आफ्नो बयानमा रणनीतिक निर्णयहरू लिइएको कुरा उल्लेख गरे। यसको संकेत यो हो कि पाकिस्तानले नियन्त्रण रेखामा सैन्य उपस्थिति बढाइरहेको छ ।
यद्यपि, यो अन्तर्वार्तापछि एक्सप्रेस ट्रिब्यूनसँग कुरा गर्दै ख्वाजा आसिफले  सम्भावित युद्धबारे उनको बयानलाई गलत बुझिएको बताएका छन् ।

ख्वाजा आसिफले पाकिस्तानी टेलिभिजन च्यानल सामा टिभीसँग कुरा गर्दै भने, ‘हामीले मानसिक रूपमा तयार रहनुपर्छ । युद्धको आशंका मडारिरहेको छ । यो सम्भावना छ आगामी दुई-तीन वा चार दिनमा हामी युद्धमा हुन सक्छौं ।’  यद्यपि, पछि जियो न्यूजसँग उनले भने, ‘मलाई सोधिएको थियो कि युद्धको सम्भावना कति छ, मैले भनेको थिएँ कि आगामी दुई-तीन दिन महत्त्वपूर्ण छन् । यदि केही हुने हो भने आगामी दुई-तीन दिनमा हुन्छ ।’

ख्वाजा आसिफले भने कि उनको बयानलाई युद्ध हुने भविष्यवाणीको रूपमा नबुझियोस्, बरु उनको मतलब यो हो कि आगामी दुई-तीन दिन महत्त्वपूर्ण छन् ।पाकिस्तानका रक्षामन्त्रीले यो पनि बताए कि पाकिस्तानले मित्र राष्ट्रहरूसँग अवस्थालाई टार्नका लागि सम्पर्क गरेको छ ।

उनले पाकिस्तानले खाडीका देशहरू र चीनसँग कुरा गरेको बताए । साथै बेलायत र अमेरिकालगायत अन्य देशहरूलाई पनि अवस्थाबारे जानकारी गराएको उनको भनाइ छ ।

ख्वाजा आसिफको बयानपछि बुधबार बिहान पाकिस्तानका सूचना मन्त्री अताउल्लाह तरारले एक्समा पोस्ट गरे । आफ्नो बयानमा तरारले लेखे, ‘पाकिस्तानसँग विश्वसनीय गुप्तचर जानकारी छ कि भारतले पहलगाम घटनालाई बहाना बनाएर आगामी २४ देखि ३६ घण्टाभित्र सैन्य कारबाही गर्ने मनसाय राख्छ ।  कुनै पनि प्रकारको आक्रमणको निर्णायक जवाफ दिइनेछ । क्षेत्रमा सम्भावित विनाशकारी परिणामको जिम्मेवारी भारतको हुनेछ ।’

२२ अप्रिलमा जम्मु कश्मीरको पहलगामको बैसरन उपत्यकामा पर्यटकमाथि भएको आक्रमणमा एक स्थानीय कश्मीरीसहित २६ जनाको मृत्यु भएको थियो ।