केनको उपाधि खडेरी ३१ वर्षको उमेरमा अन्त्य

काठमाडौं । इङ्ल्यान्ड राष्ट्रिय फुटबल टोलीका कप्तान ह्यारी केनले अन्ततः आफ्नो खेल जीवनको पहिलो उपाधि जितेका छन् ।

जर्मन क्लब बायर्न म्युनिखले आफ्नो कीर्तिमानी ३३औं बुन्डेसलिगा जित्दा स्ट्राइकर केनले पनि उपाधिको खाता खोलेका हुन् ।

सन् २०१० देखि सिरियर स्तरमा फुटबल करिअर सुरु गरेका केनले २०२५ मा पहिलो उपाधि जितेका हुन् । त्यतिबेला उनी १६ वर्षका थिए अहिले ३१ वर्षका भएका छन् ।
फ्राइबर्ग र बायर लेभरकुसेनबीचको खेल २–२ गोलको बराबरीसँगै बायर्नलाई लिग उपाधि पक्का भएको हो ।

यसअघि बायर्नले आरबी लाइपजिगसँग ३–३ को रोमाञ्चक बराबरी खेलेको थियो । खेलको सुरुवातमा बायर्न दुई गोलले पछि परेको थियो — बेञ्जामिन सेस्को र लुकास क्लोस्टरम्यानले लाइपजिगलाई अग्रता दिलाएका थिए । तर बायर्नले इरिक डाएर र माइकल ओलिसेको गोलमार्फत खेलमा फर्किएको थियो भने लिरोय सानेले अग्रता दिलाएका थिए । तर अन्तिम समयमा युसुफ पाउल्सेनले गोल गर्दै खेल बराबरीमा ल्याएपछि बायर्नको उपाधि उत्सव एकदिन पछि सरेको थियो ।

केन भने उक्त खेलमा निलम्बनका कारण मैदानमा उपस्थित थिएनन्, तर फ्राइबर्ग र लेभरकुसेनबीचको बराबरीसँगै उनी पहिलो पटक आफ्नो क्लब करियरमा ट्रफी जित्न सफल भए ।

केनले यो सिजन बायर्नका लागि ३६ गोल र १२ असिस्ट गरेका छन् । अघिल्लो सिजन उनले कुल ४४ गोल गरेका थिए, तर लेभरकुसेनको अपराजित सिजनका कारण उपाधिबाट बञ्चित भएका थिए ।

केनले बायर्नका लागि हालसम्म ८९ खेलमा ८० गोल गरिसकेका छन् । आगामी सिजनमा पनि उनले थप ट्रफी जित्ने अपेक्षा गरिएको छ । विशेषगरी जब लेभरकुसेनका प्रशिक्षक जाभी आलोन्सो सम्भवतः रियल मड्रिड जाने तयारीमा छन् र डर्टमुण्डको प्रदर्शन उतारचढावमै सीमित छ ।

बुन्डेसलिगाको गोल्डेन बुट पनि केनले जित्ने लगभग पक्का छ । उनले लेभरकुसेनका प्याट्रिक शिकभन्दा ६ गोल बढी गरेका छन्, जब लिगमा अझै दुई खेल बाँकी छन् ।

केनले यसअघि दुई युरोकप र एक च्याम्पियन्स लिगलगायत केही फाइनल हारेका थिए । इङ्लिस फुटबलमा कुनै उपाधि जित्न नसकेपछि उनी सन् २०२३ मा जर्मनी गएका थिए ।