रास्वपालाई राप्रपाको साथ, ज्ञानेन्द्र शाही भन्छन्– गृहमन्त्रीको मात्र होइन प्रधानमन्त्रीको समेत राजीनामा माग्छौं

काठमाडौं । राष्ट्रिय स्वतन्त्र पार्टी (रास्वपा)ले जेठ १३ गते गृहमन्त्री रमेश लेखकको राजीनामा माग्दै गर्ने संसद् अवरुद्धमा राजसंस्था पक्षधर दल राष्ट्रिय प्रजातन्त्र पार्टी (राप्रपा)ले पनि साथ दिने भएको छ ।

जेठ १५ गते हुने आन्दोलनको तयारीबारे गोकर्णेश्वरको तारेभीरमा आइतबार आयोजित अगुवा कार्यकर्ताको भेलामा प्रमुख सचेतक शाहीले नेपाल भ्युजसँग कुरा गर्दै भ्रष्टाचारविरुद्ध हुने जुनसुकै आन्दोलनमा साथ हुने बताए ।

‘हामी भ्रष्टाचारमा विरुद्धमा एकजुट छौं । एकजुट भइसकेपछि चाहे जोसुकैलाई होस् हाम्रो साथ रहन्छ,’ उनले भने ।

शाहीले भिजिट भिसा प्रकरणमा गृहमन्त्री लेखकको मात्र नभएर प्रधानमन्त्री केपी शर्मा ओलीको समेत राजीनामा माग्नुपर्नेमा जोड दिए । थुनामा रहेका व्यक्तिले प्रधानमन्त्रीका स्वकीय सचिवको पनि नाम लिएको प्रशंग कोट्याउँदै शाहीले यसबारे प्रधानमन्त्री ओलीले संसद्मा जवाफ दिनुपर्ने बताए ।

‘भिजिट भिसा प्रकरणबारे हामी पनि १३ गतेको संसद्मा जवाफ माग्छौं । गृहमन्त्री मात्र होइन, प्रधानमन्त्रीको पनि राजीनामा माग्छौं । थुनामा रहेका व्यक्तिले स्वयम् प्रधानमन्त्रीका स्वकीय सचिव राजेश बज्राचार्यले एक करोड रुपैयाँ मागेको भनेर बयान दिएका छन् । प्रधानमन्त्री ओलीले यसको जवाफ पर्सी संसद्मा दिनुपर्छ, उनले भने ।

मंगलबारको संसद् बैठकमा प्रस्तुत हुने विषयबारे पार्टीले बैठक राखेर सामुहिक निर्णय गर्ने प्रमुख सचेतक शाहीले बताए ।

रास्वपाको चेतावनी : १३ गतेको संसद् बैठक सामान्य हुँदैन