रास्वपाले संसद् बैठकमा गृहमन्त्रीलाई उनकै पुराना तर्क सम्झाउँदै राजीनामा माग्ने

काठमाडाैं । राष्ट्रिय स्वतन्त्र पार्टी (रास्वपा)ले मंगलबार बस्ने प्रतिनिधिसभा बैठकमा गृहमन्त्री रमेश लेखकलाई उनकै पुराना तर्क सम्झाउँदै राजीनामा माग्ने भएको छ ।

यसअघि लेखकले आफ्ना सभापति रवि लामिछानेलाई आरोपकै आधारमा राजीनामा मागेको स्मरण गराउने निर्णय भएको कार्यवाहक प्रवक्त मनीष झाले बैठकपछि जानकारी दिए ।

‘एक वर्षअघि उहाँले हाम्रा सभापतिमाथि प्रश्न उठ्दा नैतिकताका आधारमा राजीनामा दिनुपर्ने माग गर्नुभएको थियो । उहाँलाई भोलि हामी त्यही सम्झाउन चाहन्छौं,’ संसदीय दलको बैठकको निर्णय सुनाउँदै उनले भने ।

अरुलाई नैतिकताको पाठ सिकाउनेले अहिले आफूलाई पनि यस्तै आरोप लाग्दा निशर्त राजीनामा दिनुपर्ने भन्दै झाले गृहमन्त्री लेखकलाई सम्झाए ।

संसदीय दलको बैठकमा मंगलबारको संसद् बैठकमा गृहमन्त्रीबारे कसरी प्रस्तुत हुने भन्नेबारे विस्तृत छलफल भएको जानकारी दिँदै उनले थपे, ‘हामीसँग भएको सूचना र प्रमाणका आधारमा पछिल्लो पटक गृहमन्त्री लेखकको बारेमा भिजिट भिसाका विषयमा आएका विषयवस्तुबारे प्रश्न गर्नेछौं ।’