प्रतिनिधिसभाको बैठक आधा घण्टा स्थगित

काठमाडौं । गृहमन्त्री रमेश लेखकको राजीनामा माग गर्दै विपक्षी दलहरूले संसदको अवरोध कायमै राखेपछि प्रतिनिधिसभाको बैठक आधा घण्टाका लागि स्थगित भएको छ ।

भिजिट भिसा प्रकरणमा मुछिएका गृहमन्त्री लेखकको राजीनामा माग गर्दै विपक्षी दलहरूले मंगलबारको प्रतिनिधिसभामा पनि अवरोध गरेका थिए ।

बुधबार पनि उनीहरूले अवरोध कायमै राखेका हुन् । संसदमा सिंगो विपक्षी बेञ्चले उभिएर अवरोध जारी राखेका हुन् । सभामुख देवराज घिमिरेले आसन ग्रहण गर्दै संसद सञ्चालनको वातावरण बनाउन आग्रह गरेका थिए । गृहमन्त्री लेखकले जवाफ दिन चाहेकाले वातावरण बनाउन उनले आग्रह गरेका थिए ।

तर, प्रतिपक्षी दलहरूले उभिएर विरोध कायमै राखेसँगै बैठक आधा घण्टाका लागि स्थगित भएको हो ।

माओवादी केन्द्र, राष्ट्रिय स्वतन्त्र पार्टी, एकीकृत समाजवादी, राप्रपा सहितका विपक्षी सांसदहरूले संसदमा उभिएर विरोध गरिरहेका छन् ।