ट्रम्प र पाकिस्तानी सेनाप्रमुखबीच ‘ऐतिहासिक’ भेट, के भयो कुराकानी ?

काठमाडौं । अमेरिकी राष्ट्रपति डोनाल्ड ट्रम्पले ह्वाइट हाउसमा पाकिस्तानका सेनाप्रमुख एवं फिल्ड मार्शल असिम मुनीरसँग ऐतिहासिक भेटवार्ता गरेका छन् ।

यो पहिलो पटक हो, जब कुनै अमेरिकी राष्ट्रपतिले पाकिस्तानी सेनाप्रमुखलाई बिना कुनै उच्च राजनीतिक प्रतिनिधिमण्डल एक्लै भेट गरेका छन् ।

ट्रम्पले पत्रकारहरूसँग भने, “दुई अत्यन्तै बुद्धिमान व्यक्तिले त्यो युद्धलाई निरन्तरता नदिने निर्णय गरे । त्यो युद्ध त आणविक युद्ध पनि बन्न सक्थ्यो ।” उनले भारतका प्रधानमन्त्री नरेन्द्र मोदीसँगको कुराकानीको उल्लेख गर्दै दुबै नेताको निर्णयको प्रशंसा गरे ।

पाकिस्तानी सेनाले विज्ञप्ति जारी गर्दै सो भेटमा व्यापार, आर्थिक विकास, क्रिप्टोकरेन्सी, इरान–इजरायल तनावबारे छलफल भएको जनाएको छ । मुनीरले ट्रम्पलाई इरानसँग युद्ध नगर्न र इजरायललाई रोक्न आग्रह गरेको जनाइएको छ । पाकिस्तानले इजरायली आक्रमणलाई अन्तर्राष्ट्रिय कानुनको उल्लंघन भन्दै भर्त्सना गर्दै आएको छ ।

पाकिस्तानी सेनाका अनुसार ट्रम्पले पाकिस्तानसँग दीर्घकालीन रणनीतिक साझेदारीको चाहना व्यक्त गरेका थिए ।

तर, भारतले भने ट्रम्पको दाबी अस्वीकार गर्दै युद्धविराम कुनै तेस्रो पक्षको मध्यस्थता नभई भारत र पाकिस्तानबीच सिधा सैन्य वार्ताबाट भएको स्पष्ट पारेको छ ।

भारतीय विदेश सचिव विक्रम मिस्रीका अनुसार “भारतले विगतमा पनि कुनै मध्यस्थता स्वीकार गरेको छैन, र भविष्यमा पनि गर्ने छैन ।”

ट्रम्पले भने आफ्नो प्रयासमा युद्ध रोकिएको भन्दै आफूलाई नोबेल शान्ति पुरस्कारका लागि सिफारिस गर्न आग्रह गरिएको दाबी गरेका छन् ।

विश्लेषकहरूले भने यस भेटले अमेरिका–भारत सम्बन्धमा असर पार्न सक्ने चेतावनी दिएका छन् । एशिया प्रशान्त विशेषज्ञ माइकल कुगेलम्यानका अनुसार “भारत कति हदसम्म अमेरिका–पाकिस्तानको सहकार्य सहन सक्छ भन्ने प्रश्न फेरि उठेको छ ।”

भारतले ‘आतंकवादी हमलाको मास्टरमाइन्ड’ भनेको पाकिस्तानी सेनापतिसँग ट्रम्पको दिवाभोज