चुनौतीका चाङले थिचिएको क्लब विश्वकप : रित्तो रंगशाला, असन्तुलित टिम र थाकेका खेलाडी

काठमाडौं । अमेरिकामा जारी फिफा क्लब विश्वकपको सुरुवाती खेलमा अर्जेन्टिनी सुपरस्टार लियोनल मेसी मैदानमा उत्रिँदा हजारौं समर्थक मियामीको हार्ड रक रंगशाला पुगे । उनले खेलमा गोल गर्न नसके पनि उपस्थित दर्शकहरूका लागि यो एक ऐतिहासिक क्षण रह्यो । मेसीका अलावा डेभिड बेक्ह्याम, रोनाल्डो, काका, बेबेटो, रोबर्टो बाजियो र जेभियर जानेट्टीजस्ता फुटबल दिग्गजहरू भीआईपी सिटमा थिए ।

तर फिफा अध्यक्ष जियानी इन्फान्टिनोले ‘ऐतिहासिक सुरुवात’ भनेको क्लब विश्वकप उद्घाटनपछि विभिन्न चुनौतीमा फसेको देखिएको छ । तापक्रम, खेल तालिका, असमान प्रतिस्पर्धा र थोरै दर्शक उपस्थिति लगायतका विषयले प्रतियोगिताप्रति प्रश्न उठाएका छन् । यो प्रतियोगिता रौनक हराएकोजस्तो देखिएको कतिपय फुटबल पण्डितहरूले विश्लेषण गरेका छन् । निष्कर्षमा भन्दा क्लब विश्वकप विभिन्न चुनौतीका चाङले थिचिएको स्पष्ट देख्न सकिन्छ ।

चरम गर्मीमा खेल

कतिपय खेलहरू दिउँसो १२ बजे र ३ बजे स्थानीय समयमा निर्धारित गरिएका छन्, जसले गर्दा चर्को गर्मीमा खेलाडीहरू प्रभावित भएका छन् । पासाडिनाको रोज बाउलमा भएको पेरिस सेन्ट जर्मेन (पीएसजी) र एट्लेटिको म्याड्रिडबीचको खेलमा तापक्रम ३१ डिग्री सेल्सियस पुगेको थियो । पीएसजीका प्रशिक्षक लुइस एनरिके भन्छन्, ‘गर्मीको असर हाम्रो खेलमा देखियो ।’

थकाइ र चोटको जोखिम

नौ दिनभित्र तीन खेल खेल्नुपर्ने तालिकालाई लिएर खेलाडी संघ (फिप्रो)ले चासो व्यक्त गर्दै भन्यो, ‘खेलाडीहरूको मानसिक र शारीरिक स्वास्थ्यमा गम्भीर असर पार्ने खालको निर्णय फिफाबाट गरिएको छ ।’ संघका अनुसार लगातार घरेलु र अन्तर्राष्ट्रिय सिजन खेलेका खेलाडीहरू क्लब विश्वकप पनि खेल्नुरेपछि अत्यधिक थकित छन् ।

एकतर्फी खेल र कमजोर प्रतिस्पर्धा

जर्मन क्लब बायर्न म्युनिखले न्युजिल्यान्डको अकल्यान्ड सिटीलाई १०–० ले हराउँदै क्लब विश्वकपको इतिहासमै फराकिलो जित दर्ता गर्यो । अकल्यान्डका खेलाडीमध्ये धेरैजसो अर्ध–व्यवसायिक छन् । उनीहरू नियमित रूपमा अन्य पेशामा संलग्न छन् । अब अकल्यान्डले अझै कठिन खेल बेनफिका र बोका जुनियर्ससँग खेल्न बाँकी छ ।

रंगशालामा रित्तोपन

खेलका सुरुवाती दिनमा केही खेलहरूमा उल्लेख्य दर्शक उपस्थिति देखिए पनि अन्य खेलहरू भने रित्तो रंगशालामा सम्पन्न भएका छन् । मियामीमा भएको उद्घाटन खेलमा उल्लेख्य उपस्थिति भए पनि अटलान्टामा भएको चेल्सी र एलएएफसीबीचको खेलमा ७५ हजार क्षमताको रंगशालामा केवल २२ हजार दर्शक मात्र उपस्थित थिए ।

त्यस्तै, फिलाडेल्फियामा भएको फ्लामेन्गो र एस्पेरेन्स डी ट्युनिसबीचको खेलमा २५ हजार दर्शक मात्र पुगे । सेयाटलमा बोटाफोगो र सीएटल साउन्डर्सको खेलमा पनि केवल ४३ प्रतिशत रंगशाला भरियो । यसैगरी मेटलाइफ स्टेडियममा पामेइरास र पोर्टोबीचको खेलमा ५६ प्रतिशत मात्र दर्शक उपस्थिति थियो ।

के भविष्य होला ?

फिफाले १.५ मिलियनभन्दा बढी टिकट बिक्री भइसकेको बताएको छ । यद्यपि बाँकी ३६ मध्ये १३ खेल दिउँसो (कार्यालय समयमा) तोकिएको हुँदा दर्शक उपस्थिति अझै न्यून हुने आशंका गरिएको छ ।

फिफाले भने खेलाडी कल्याणलाई प्राथमिकतामा राखिएको बताउँदै ‘कुलिङ ब्रेक’ र अतिरिक्त प्रतिस्थापनजस्ता उपाय लागू गरिएको दाबी गरेको छ । तर यो दाबी र मैदानको वास्तविकता बीचमा गहिरो खाडल देखिएको छ । (अल जजिराबाट साभार गरिएको यो सामग्री नेपालभ्युजका लागि दीपेन्द्र सापकोटाले अनुवाद गरेका हुन् ।)