एनपीएलका लागि लुम्बिनीले रिटेन गर्‍यो रोहितसहित ६ खेलाडी

काठमाडौं । नेपाल प्रिमियर लिग (एनपीएल) क्रिकेटको आगामी दोस्रो संस्करणका लागि लुम्बिनी लायन्सले ६ खेलाडी रिटेन गरेको छ । नेपाली राष्ट्रिय टोलीका कप्तान रोहित पौडेलसहित ६ खेलाडीलाई रिटेन गरेको लुम्बिनीले सामाजिक सजालमार्फत जनाएको छ ।

रिटेन हुने अन्य खेलाडीमा सन्दीप जोरा, विवेक यादव, दिनेश अधिकारी, अभिशेष गौतम र तिलक भण्डारी छन् ।

लुम्बिनीबाट सूर्य तामाङ, अर्जुन साउद, आशुतोष घिरैया, दुर्गेश गुप्ता, विकास आग्री र आरिफ खान गरी ६ जना खेलाडी रिलिज भएका छन् ।

यसअघि सुदूरपश्चिम रोयल्स र चितवन राइनोजले ६ खेलाडी रिटेन गरिसकेका छन् ।

रोहितले पहिलो संस्करणको एनपीएलमा लुम्बिनीको कप्तानी गरेका थिए । आठ टोली सम्मिलित प्रतियोगितामा लुम्बिनी पुछारमा रहेको थियो ।

यसैबीच लुम्बिनी लायन्सका अध्यक्ष ईश्वर जीसीले रिलिज गरिएका खेलाडीलाई बुधबार एक प्रेस विज्ञप्ति जारी गर्दै धन्यवाद दिएका छन् ।

‘म ती सम्पूर्ण खेलाडीहरूलाई विशेष धन्यवाद दिन चाहन्छु, जसले हाम्रो यात्रा सुरु गर्दा हामीलाई साथ दिनुभयो,’ उनले भनेका छन्, ‘उहाँहरूको योगदान अमूल्य रह्यो र उहाँहरू सधैं हाम्रो परिवारका हिस्सा रहनुहुनेछ । हामी उहाँहरूलाई सधैं सम्झिरहनेछौं र भविष्यमा फेरि एउटै जर्सीमा उहाँहरूलाई पाउनु पनि सम्भव हुनसक्छ भन्ने आशा राख्दछौं ।’