११ जना सडक आश्रित मानवहरुको उद्धार

जनकपुरधाम, ४ कात्तिक । मेची–महाकाली राष्ट्रिय उद्धार यात्राको छैटौँ दिन शनिबार ११ जना सडक आश्रित मानवहरुको उद्धार गरिएको छ ।

‘यो पटकको चाडपर्वमा कसैले बस्न नपरोस् सडकपेटीमा’ भन्ने भावनासहित मानवसेवा आश्रम र आनी छोइङ डोल्मा फाउन्डेसनको संयुक्त आयोजनामा यात्रा सुरु भएको हो । मेची–महाकाली राष्ट्रिय उद्धार यात्राअन्तर्गत शनिबार लहान नगरपालिका वडा १ बाट २ जना, वडा ३ बाट ३ जना, गोलबजार नगरपालिका ६ बाट २ जना र मिर्चैया नगरपालिका ७ बाट १ जना गरी सिरहाबाट ८ जना र त्यस्तै धनुषा जिल्लाको जनकपुरधाम नगरपालिकाबाट १ बाट २ जनाको उद्धार भएको हो ।

मेचीनगरदेखि सुरु भएको यात्रा शनिबार जनकपुरधामसम्म आइपुग्दा ६८ जना सडक आश्रित मानवहरुको उद्धार गरिएको मानवसेवा आश्रमका संस्थापक अध्यक्ष रामजी अधिकारीले बताउनुभएको छ ।

उद्धार हुनुभएका ८ जना पुरुष र ३ जना महिलालाई मानवसेवा आश्रम जनकपुरधाम सेवाकेन्द्रमा गृह प्रवेशका लागि लगिएको छ । उद्धार टोली आइतबार जनकपुरधाम, महेन्द्रनगर, ढल्केबर, बर्दिबास हुँदै गौशालामा सहभोज गरी सर्लाहीका विभिन्न सडकपेटी तथा सार्वजनिक स्थलमा बेवारिसे अवस्थामा रहनुभएका मानवहरुको उद्धार तथा सेवामा रहने कार्यक्रम रहेको छ ।

The post ११ जना सडक आश्रित मानवहरुको उद्धार appeared first on Jhapa Online.