नेपालगञ्जमा दुई मोटरसाइकल ठोक्किएः एक जनाको मृत्यु, अर्का गम्भीर घाइते

राँझा – बाँकेको नेपालगञ्जमा आइतबार राति भएको मोटरसाइकल दुर्घटनामा एक जनाको मृत्यु भएको छ भने अर्का एक गम्भीर घाइते भएका छन् ।

नेपालञ्ज उपमहानगरपालिका–४ बसपार्क बाइपास रोडनजिक भे६प ८०२ नं र ज३प ७१७१ नंको मोटरसाइकल एकापसमा ठोक्किँदा नेपालगञ्ज–६ का २६ वर्षीय अमनकुमार कसौधनको मृत्यु भएको जिल्ला ट्राफिक प्रहरी कार्यालयका प्रमुख प्रहरी निरीक्षक पुष्कर पन्तले जानकारी दिए ।

उनका अनुसार उक्त दुर्घटनामा नेपालगञ्ज–११ का १८ वर्षीय एहसान शेख गम्भीर घाइते भएका छन् । घाइते शेखको उपचार नेपालगञ्जस्थित भेरी अस्पतालमा हुन नसकेपछि थप उपचारका लागि भारतको लखनऊ पठाइएको छ ।

दुर्घटनामा गम्भीर घाइते भएका दुवै मोटरसाइकल चालकलाई उपचारका लागि शिक्षण अस्पताल नेपालगन्ज लगिएकामा चिकित्सकले कसौधनलाई आइतबार राति नै मृत घोषणा गरेका थिए । लखनऊ पठाइएका गम्भीर घाइते शेखको मुख, आँखा र शरीरको भित्री भागमा चोट लागेको प्रहरी प्रमुख पन्तले बताए । –रासस