‘खोरमा थुन्दैमा बाग स्याल हुँदैन’ -लामिछाने

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले खोरमा थुन्दैमा बाग स्याल नहुने बताएका छन् । मंगलबार सरकारी वकिलको कार्यलय रुपन्देहीमा बयान दिएर निस्किँदै गर्दा उनले यस्तो बताएका हुन् ।

सहकारी ठगी, सङ्गठित अपराध र सम्पत्ति शुद्धीकरणमा पोखरामा प्रहरी हिरासतमा रहेका लामिछानेलाई बयानका लागि आज रुपन्देही लगिएको थियो । लामिछानेको बयान भने आज सकिएको छैन । बुधबार बिहान १० बजेदेखि पुनः जिल्ला सरकारी वकिलको कार्यालयमा बयान हुनेछ ।

बयान नसकिएपछि लामिछानेलाई जिल्ला प्रहरी कार्यालयमा लगिएको छ ।

बुटवलमा रहेको सुप्रिम बचत तथा ऋण सहकारी संस्थाको बचतकर्ताको बचत रकम तथा ऋण हिनामिना गरेको आरोपमा किटानी जाहेरी परेपछि प्रहरीले लामिछानेलाई पक्राउका लागि अदालतबाट अनुमति लिएको थियो । कात्तिक ८ गते रुपन्देही जिल्ला अदालतले लामिछानेसहितका आरोपीलाई पक्राउका लागि पुर्जी जारी गरेको थियो ।