झापामा मागको एक तिहाइ मात्र बेसार उत्पादन

सन्तोष शर्मा
झापा, १६ मंसिर । झापामा उत्पादित बेसारले मागको ३० प्रतिशत मात्र माग धान्ने गरेको छ ।

भान्सामा दिनहुँ प्रयोग हुने बेसार जिल्लामा उत्पादनका हिसाबले हेर्दा एक तिहाइ मात्र पूर्ति हुने कृषि ज्ञान केन्द्र झापाका प्रमुख सागर विष्टले जानकारी दिनुभयो । झापामा गत वर्ष दुई सय ३० हेक्टरमा करिब एक हजार आठ सय ५६ टन बेसार उत्पादन भएको थियो ।

“उत्पादित बेसारलाई प्रशोधन गरेपछि झण्डै चार लाख केजी धुलो बेसार हुन्छ”, उहाँले भन्नुभयो, “जिल्लामा बेसार खपतका हिसाबमा हेर्ने हो भने यो ३० प्रतिशतको हाराहारीमा पुग्छ ।” झापामा इलाम र सुनसरीबाट बेसार आउने गरेको विष्ट बताउनुहुन्छ ।

जिल्लामा स्थानीय जातका बेसार खेती हुने गरेको छ । झापाको कचनकवल, दमक, अर्जुनधारा लगायतका बेसार खेती हुने गरेको छ ।

जिल्लामा खुलेका साना–ठूला मसला प्रशोधन उद्योगका कारण बेसार खेतीतर्फ कृषक आकर्षित हुन थालेका छन् । कचनकवलको साथी कृषिफर्म, बिर्तामोडको मेची खाद्य प्रशोधन उद्योग र दमकको सेतुमारी कृषि सहकारीले बेसार प्रशोधन गर्दै आएको छ ।

यी तीन वटा संस्थालाई प्रशोधन मेसिन र आवश्वयक पूर्वाधार निर्माणका लागि रू ६० लाख अनुदान उपलब्ध गराइएको कृषि ज्ञान केन्द्र झापाले जनाएको छ । “दमकमा कृषि सहकारीले सदस्यलाई बेसार उत्पादन गर्न प्रोत्साहन गर्न थालेपछि खेती गर्ने कृषकको संख्या बृद्धि भएको छ”, प्रमुख विष्टले भन्नुभयो, “झापामा बेसार खेतीको सम्भावना पनि धेरै छ ।”

झापाका भारतीय सीमावर्ती क्षेत्रबाट वैध–अवैध रुपमा बेसार भित्रिँदा चुनौती देखिएको विष्टले बताउनुभयो । “भारतको बेसार सस्तो छ”, उहाँले भन्नुभयो, “जसले चुनौती पनि देखिन्छ ।”

कृषकले समेत माटोसहितको बेसार बेच्न लाँदा उचित मूल्य नपाउने अवस्था छ । आफूले उत्पादन गरेको बेसारलाई सफा बनाएर बेच्न लाँदा राम्रो मूल्य पाउने विष्टको भनाइ छ । झापामा गत वर्ष प्रतिकेजी गोटा बेसार रू १३० देखि रू १५० सम्ममा बिक्री भएको थियो । बजारमा धुलो बेसारको मूल्य रू ३५० देखि रू ५०० सम्म रहेको छ ।

The post झापामा मागको एक तिहाइ मात्र बेसार उत्पादन appeared first on Jhapa Online.