एनपीएलका दर्शकलाई खल्तीको अनुरोध– फाइनलका सबै टिकट बिक्री भइसके, बाँकीले घरबाटै हेर्नू

काठमाडौं । नेपाल प्रिमियर लिग (एनपीएल) क्रिकेटको फाइनलका लागि सबै टिकट बिक्री भइसकेको डिजिटल वालेट खल्तीले जनाएको छ ।

शनिबार हुने फाइनल खेलका लागि बिहीबार साँझ नै सबै टिकट बिक्री भइसकेको एनपीएलको आधिकारिक टिकटिङ पार्टनर खल्तीले जानकारी दिएको हो ।

‘अब कुनै पनि भौतिक टिकट नपाइने भएकाले बाँकी दर्शकलाई घरमै बसेर टीभी र युट्युबमा आउने प्रत्यक्ष प्रसारणमार्फत फाइनल हेर्न अनुरोध गरिन्छ,’ एनपीएलको फेसबूक पेजमार्फत खल्तीले भनेको छ ।

शनिबार कीर्तिपुरस्थित त्रिवि मैदानमा मध्यान्ह १२ बजेपछि सुदूरपश्चिम रोयल्स र जनकपुर बोल्ट्सबीच एनपीएलको उपाधि भिडन्त हुँदैछ । यसपछि एनपीएलले पहिलो विजेता पाउने छ ।

एनपीएलमा आज (शुक्रबार) कुनै खेल छैनन् । शनिबार फाइनल खेल रहेकाले आज विश्राम दिइएको हो ।

एनपीएलमा आज छैनन् कुनै खेल, भोलि सुदूरपश्चिम र जनकपुरबीच उपाधि भिडन्त