यहाँका सबै नागरिकको घरमा छ आफ्नै विमान !

एजेन्सी । आजकल प्रत्येक घरमा प्राय: कुनै न कुनै सवारी साधन हुन्छ, चाहे त्यो मोटरसाइकल होस् वा कार । यो त सामान्य कुरा हो तर, आज हामी तपाईंलाई यस्तो ठाउँको बारेमा बताउँदैछौ, जहाँका व्यक्तिसँग दुई वा चार पाङ्ग्रे गाडी होइन, सिधै हवाई जहाज हुन्छ ।

उनीहरूका लागि यो त्यति नै सामान्य छ, जति हाम्रा लागि सडकमा गाडी कुदाउनु । उनीहरू सानोभन्दा सानो कामको लागि बाहिर जानु परे विमान निकाल्छन् ।

अमेरिकाको क्यालिफोर्नियामा यस्तो ठाउँ छ, जहाँ हरेक घरको अगाडि गाडीको सट्टा एउटा विमान पार्क गरिएको हुन्छ । उनीहरू कतै जानु परे, विमान निकाल्छन् र उडेर जान्छन् । यस ठाउँमा सडकहरू पनि रनवे जस्तै देखिन्छन् ।

क्यालिफोर्नियाको क्यामरन एयर पार्क नामक यस ठाउँमा सामान्य सडक छैनन्, बरु धेरै फराकिला मार्ग बनाइएका छन्, जसको प्रयोग रनवेको रूपमा विमानस्थलसम्म पुग्न गरिन्छ ।

विमान साधारण व्यक्तिले त चलाउन सक्दैनन्, यो पनि रोचक छ कि यहाँ बस्ने लगभग सबै मानिस पाइलट हुन् र आफ्नो विमान आफैँ उडाएर लैजान्छन् । यस्ता गाउँलाई एक प्रकारको फ्लाई–इन कम्युनिटी भनिन्छ ।

यहाँ बस्ने व्यक्तिहरू शनिबारको बिहान भेला भएर स्थानीय विमानस्थलसम्म जान्छन् । अमेरिकामा यस्ता झन्डै ६१० एयर पार्क छन्, जहाँ बस्ने सबै व्यक्तिसँग विमान छ ।

वास्तवमा, दोस्रो विश्वयुद्धको समयमा बनेका एयरफिल्डहरूलाई परिवर्तन गरिएन र तिनलाई पछि गएर आवासीय एयर पार्कमा परिणत गरियो । यहाँ केवल सेवा निवृत्त सैनिक पाइलट बस्छन् ।

१९४६ को समयमा अमेरिकामा कुल ४ लाख पाइलट थिए, जो यस्ता एयरपार्कमा बस्न थाले । क्यामरन पार्क पनि १९६३ मा बनेको थियो र यहाँ कुल १२४ घर छन् । यहाँका सडकको नाम र स्ट्रिट साइन पनि विमान–मैत्री छन् ।