अभिनेत्री तमन्ना भाटियाका कारण कर्नाटक सरकार विवादमा

मुम्बई ।

 कर्नाटक सरकारमा राजनीतिक उथलपुथल भएकाे  छ ।

 प्रतिपक्ष मात्रै होइन, जनताले पनि यतिखेर कर्नाटक सरकारको तीव्र आलोचना गरिरहेका छन् । विपक्षीले कर्नाटक सरकारका मन्त्री एमबी पाटिलविरुद्ध मोर्चा खोलेका छन्, कारण हाे बलिउड, तलिउड नायिका तमन्ना भाटिया ।

 खासमा कर्नाटक सरकारले उनलाई मैसूर स्यान्डल सोप कम्पनीको ब्रान्ड एम्बेसडर बनाए पछि सरकार घेराबन्दीमा परेकाे हाे । स्थानिय जनता र प्रतिपक्षले मन्त्री पाटिलमाथि प्रश्न उठाएका छन् र उनको राजीनामाको समेत माग गरिरहेका छन् । जनताले सामाजिक सञ्जालमा सरकारविरुद्ध मोर्चा खोलेका छन् । उनीहरूकाे प्रश्न छ, के कर्नाटकमा स्थानिय फिल्म अभिनेत्रीहरू छैनन् ?  प्रतिपक्षले यो विषय उठाउँदै सरकारलाई घेरेको हाे । तमन्नालाई ब्राण्ड एम्बेसडर बनाउने साबुन कम्पनीलाई सरकारको सहयोग रहेको छ, जसका कारण स्थानिय अभिनेत्रीसँग काम नगरी बलिउड अभिनेत्रीसँग काम गरेकाे उनीहरूकाे भनाइ छ । 

 उनीहरू भन्छन् कि कर्नाटकबाट स्थानीय सेलिब्रिटी छनोट गर्नुको सट्टा तमिलनाडु फिल्म अभिनेत्री तमन्ना भाटियालाई स्थानीय साबुनको विज्ञापनको लागि किन छनोट गरियो ? यसले ‘स्थानीय प्रतिभालाई बेवास्ता गरेको’ र ‘कर्नाटकको गौरव’ मा चोट पुगेको उनीहरूकाे भनाइ छ।

 प्रदेश सरकारले गत बिहीबार ब्रान्ड एम्बेसडरकाे औपचारिक घोषणा गरेको थियाे । लगत्तै तमन्नालाई ब्रान्ड एम्बेसडर बनाएको सूचना इन्टरनेटमा भाइरल भयो । मनी कन्ट्रोलको रिपोर्टका अनुसार यस सम्झौता अन्तर्गत तमन्नाले आगामी दुई वर्षसम्म हेरिटेज ब्रान्डको प्रवद्र्धन गर्ने छिन् । तमन्ना यस साबुनको प्रचार गर्ने दोस्रो गैर-स्थानीय ब्रान्ड एम्बेसडर हुन्। यसअघि सन् २००६ मा पूर्व भारतीय कप्तान एमएस धोनीले यो साबुनको प्रचार गरेका थिए ।

केएसडिएललाई पनि सार्वजनिक खरिद ऐनको कर्नाटक पारदर्शिताको धारा ४ (जी) अन्तर्गत अभिनेतालाई ६.२ करोड रुपैयाँ प्रत्यक्ष भुक्तानी गर्न छुट दिइएको छ। यो साबुनको ब्रान्ड कर्नाटक सरकारको स्वामित्वमा रहेको कम्पनी ‘मैसूर स्यान्डल सोप’सँग सम्बन्धित छ। यो साबुनलाई प्रवर्द्धन गर्न र जनतामाझ पुनः लोकप्रिय बनाउन एक प्रसिद्ध अनुहार आवश्यक थियो। यसका लागि चलचित्र अभिनेत्री तमन्ना छनोट गरिएकाे हाे । उनी दक्षिण सिनेमाको चर्चित व्यक्तित्व मानिन्छिन् ।

उता, कर्नाटक सरकारका उद्योग मन्त्री एमबी पाटिलले तमन्ना विवादमा स्पष्टीकरण दिएका छन्। तमन्नालाई उनको ‘ब्राण्ड भ्यालु’ र ‘व्यापक मान्यता’का आधारमा मात्रै छनोट गरिएको उनको भनाइ छ, जसले गर्दा युवामाझ ब्राण्डको पहिचान पुनः निर्माण गर्न सकिन्छ । उनले यसमा कुनै राजनीति वा क्षेत्रीयता नभएको स्पष्ट पारेका छन्  ।

 यद्यपि, भाजपा र जेडीएस नेताहरूले मन्त्रीले व्यक्तिगत प्रचारको लागि ‘सरकारी सम्पत्ति’ लाई माध्यम बनाएको आरोप लगाएका छन्। भाजपा नेताले कडा प्रतिक्रिया दिदै भने ‘सरकारी कम्पनीलाई कर्नाटकको पहिचानका रूपमा प्रस्तुत गर्नुपर्छ, बाहिरबाट सेलिब्रेटीलाई अगाडि ल्याएर होइन । यो स्थानीय कलाकारको अपमान हो ।’