पुलिसविरुद्ध पहिलो इनिङ्समा आर्मीलाई ३७ रनको अग्रता

काठमाडौं। जय ट्रफी एलिट कप क्रिकेटको फाइनलमा नेपाल पुलिस क्लबविरुद्ध त्रिभुवन आर्मी क्लबले पहिलो इनिङ्समा ३७ रनको अग्रता लिएको छ ।

वीरगञ्जस्थित नारायणी क्रिकेट मैदानमा जारी फाइनल खेलको दोस्रो दिन आर्मी १७० रनमा अलआउट भयो । यसअघि, पहिलो इनिङ्स पुलिसले १३३ रनमा डिक्लेयर गरेको थियो ।

आर्मीका लागि भीम सार्कीले अर्धशतकीय पारी खेले । उनले ५५ बलमा ६ चौका र ३ छक्का प्रहार गरे । बसिर अहमदले ५० बलमा ४० रन बनाए ।

सोमपाल कामीले ३२, कप्तान विनोद भण्डारीले १४ र इमरान शेखले १० रन बनाए । अन्य खेलाडीले दोहोरो अङ्क छुन सकेनन् ।

पुलिसका लागि सागर ढकालले ५ विकेट लिए । सागरले १५.५ ओभरमा ७८ रन खर्चे । सो क्रममा उनले ३ मेडन ओभर फाले ।

कुशल भूर्तेलले ३ विकेट लिए ।  ललित राजवंशी र गुल्शन झाको नाममा १–१ विकेट गयो ।