कविताको अलराउण्ड प्रदर्शनमा सुदूरपश्चिमको लगातार दोस्रो जित

काठमाडौं । महिला प्रधानमन्त्री कपमा सुदूरपश्चिम प्रदेशले लगातार दोस्रो जित हासिल गरेको छ ।

धनगढीको फाप्ला क्रिकेट मैदानमा बुधबार भएको खेलमा सुदूरपश्चिमले लुम्बिनी प्रदेशलाई ७५ रनले पराजित गरेको हो । यसअघि सुदूरपश्चिमले गण्डकी प्रदेशलाई ७ विकेटले पराजित गरेको थियो ।

सुदूरपश्चिमले दिएको १२८ रनको लक्ष्य पछ्याएको लुम्बिनी १९.१ मा अलआउट भएर ५२ रन मात्र बनाउन सक्यो ।

लुम्बिनीका लागि कप्तान सरस्वती घर्ती मगरले १२ रन र सरस्वती पुनले १४ रन जोडिन् । अन्य खेलाडीले दोहोरो अङ्कको रन बनाउन सकेनन् ।

सुदूरपश्चिमका लागि रेवती धामीले ३, आशिका महराले २ तथा कविता कुँवरले १ विकेट लिइन् ।

यसअघि सुदूरपश्चिमले पूरै ओभर खेलेर ६ विकेटको क्षतिमा १२७ रन बनाएको थियो ।

सुदूरपश्चिमका लागि कविता कुवँरले अर्धशतकीय पारी खेलिन् । कविताले ३३ बलमा ८ चौका प्रहार गरेर ५५ रनको योगदान गरिन् ।

मनिषा बोहराले २३ रन बनाइन् । रितु कनौजियाले १८ रनमा अविजित रहिन् ।

लुम्बिनीका लागि सरस्वती पुनले ३ तथा सम्झाना मगर र मधु डिसीले १–१ विकेट लिए ।

बिहीबार हुने खेलमा गण्डकी प्रदेश र कर्णाली प्रदेश तथा एपीएफ र लुम्बिनी प्रदेशबीच प्रतिस्पर्धा हुनेछ ।