कोशीले बागमतीलाई १० रनले हरायो

काठमाडौं । महिला प्रधानमन्त्री कपमा कोशी प्रदेशले बागमतीलाई पराजित गरेको छ ।

धनगढीस्थित फाप्ला क्रिकेट मैदानमा भएको खेलमा कोशीले बागमतीलाई १० रनले हराएको हो । बागमती आफ्नो पहिलो खेलमा नै पराजित भएको हो ।

कोशीले दिएको ६४ रनको सामान्य लक्ष्य पछ्याएको बागमती १२.१ ओभरमा ५३ रन बनाउँदै अलआउट भयो ।

बागमतीका लागि साविका यादवले २० र विपिशा शाहीले १२ रन बनाइन् । अन्य खेलाडीले दोहोरो अङ्कको रन बनाउन सकेनन् ।

कोशीका लागि ज्योति दनवार, रुबिना क्षेत्री र सङ्गीता राईले २–२ तथा निशा शाहले १ विकेट लिइन् ।

यसअघि कोशीले निर्धारित १३ ओभर खेलेर ७ विकेटको क्षतिमा ६३ रन बनाएको थियो ।

कोशीका लागि विमला मलाहा १९ रनमा अविजित रहिन् । कप्तान रुबिना क्षेत्रीले १५ रन बनाइन् ।

बागमतीका लागि मनिषा उपाध्यायले ४ विकेट लिइन् । सो क्रममा उनले ह्याट्रिक विकेट पनि लिइन् । पूजा साउद, विपिशा शाही र संस्कृति फुयालले १–१ विकेट लिइन् ।