पेस्तोलसहित भारतीय पक्राउ

रौतहट ।

सशस्त्र प्रहरीले रौतहटबाट शनिबार राति अवैध कटुवा पेस्तोलसहित एक भारतीय नागरिकलाई पक्राउ गरेको छ । विहार जिल्ला पूर्वी चम्पारण मोतिहारी वसन्तपुर ग्राम पञ्चायत–९ का २६ वर्षीय धनञ्जयकुमार झालाई प्रहरीले पक्राउ गरेको हो ।

उनलाई सेमी अटोमेटिक पेस्तोल १ नाल, सोको म्यागेजिन १ वटा र ७ दशमलव ६५ एमएमको ४ राउन्ड गोलीसहित पक्राउ गरिएको थियो । भारतीय सीमासँग जोडिएको ईशनाथ नगरपालिका–४ लतमरी नाका नजिकै रहेको सुनिल होटलमा खाजा खाइरहेका अवस्थामा सशस्त्र प्रहरीले चेकजाँच गर्दा उनी पक्राउ परेका थिए ।

खाजा खाइरहेका उनीसहित तीन जनालाई चेकजाँच गर्ने क्रममा दुई जना तत्कालै फरार भएको र झालाई भने पक्राउ गरिएको सशस्त्र प्रहरीले जनाएको छ ।

सशस्त्र प्रहरी बल नेपाल मठियाबाट खटिएको टोलीले झालाई पक्राउ गर्नुको साथै उनले प्रयोग गरेको बीआर ०५ बीडी १२२४ नम्बरको अपाचे मोटरसाइकल एक थान र सामसुङ कम्पनीको ए ३५ मोबाइल उक थान पनि बरामद गरिएको सशस्त्र प्रहरी बल नम्बर ११ गण हेक्वाटर रौतहटका सशस्त्र प्रहरी उपरीक्षक विक्रम हुमागाईंले जानकारी दिनुभयो ।