शिवसताक्षी–८ ले दियो चार सामुदायिक विद्यालयलाई ल्यापटप र प्रिन्टर

शिवसताक्षी, १५ माघ । झापा शिवसताक्षी नगरपालिका वडा नं. ८ ले स्थानीय ४ सामुदायिक विद्यालयलाई आवश्यक ल्यापटप तथा कम्प्युटर प्रदान गरेको छ ।

आज वडा कार्यालयमा एक कार्यक्रम गर्दै शिवसताक्षी नगरपालिकाका नगरप्रमुख मेगाहाङ्ग थोप्रा र वडाध्यक्ष सन्त फेउदिनले वडा नं. ८ का ४ सामुदायिक विद्यालयलाई उक्त ल्यापटप तथा प्रिन्टर प्रदान गरेका हुन ।

शिवसताक्षी नगरपालिका वडा नं. ८ को श्री अरुणोदय आधारभूत विद्यालय, सरस्वती आधारभूत विद्यायल, भगवती आधारभूत विद्यालयलाई एक÷एक थान ल्यापटप र झिलझिले माध्यमकि विद्यालयलाई प्रिन्टर वितरण गरेको वडा नं. ८ को कार्यालयले जनाएको छ ।

सामाग्री वितरण गर्दै नगर प्रमुख थोप्राले विद्यालय अब स्मार्ट बन्नु पर्ने, कम्तीमा पनि विद्यायलले चिठी लेख्दा हातले भन्दा पनि कम्प्युटर अथवा ल्यापटपबाट प्रिन्ट गर्ने गरी वितरण गरिएकोमा वडा कार्यालयलाई धन्यवाद दिएका छन् । बाटो, पुल, कल्भर्ड बन्नु मात्र विकास नभई विद्यालय प्रविधि युक्त, विद्यालयको शैक्षिक सुधार र अन्य धेरै सामाजिक कामहरु गर्दा मात्र पूर्ण विकास हुने नगरपालिकाको बुझाई रहेको नगरप्रमुख थोप्राले जानकारी दिए ।

उनले नगरपालिकामा विकास निर्माणका लागि धेरै नागरिकहरु निवेदन लिएर आए पनि विद्यालय व्यवस्थापन समितिका अध्यक्ष र प्रधानाध्यापक बाहेक कोही पनि शैक्षिक गुणस्तर सुधारका लागि योजना लिएर नआएको गुनासो गरे । उनले भने, विद्यालय सुधारका लागि आम नागरिक, राजनीतिक दल, बुद्धिजीवि सबैको उतिकै दायित्व हुन्छ । तर यहाँ त्यस्तो देखिएन ।

वडाध्यक्ष सन्त फेउदिनले विद्यालयहरूलाई प्रविधिसँग जोड्न वडा कार्यालयले ल्यापटप र प्रिन्टर जस्ता उपकरण वितरण गरेको बताए । शिक्षा क्षेत्रमा प्रविधिको प्रयोगले शैक्षिक गुणस्तर सुधार गर्न महत्त्वपूर्ण योगदान दिन्छ ।

उनले भने, विद्यालय माग गरे बमोजिमको सामाग्री हस्तान्तरण गरिएको हो । वडाले अघिल्लो आर्थिक वर्षमा श्री अरुणोदय आधारभूत विद्यालयका विद्यार्थी ओसारपसार गर्न सिटी वितरण गरिएको र चालु आ.व.मा भगवती आधारभूत विद्यालयलाई वितरण गरिने अध्यक्ष फेउदिने जानकारी दिए ।

ल्यापट तथा प्रिन्टर ३ लाख ५० हजारको लागतमा खरिद गरिएको वडा कार्यालयले जनाएको छ । जसमा २ लाख ५० हजार वडा र १ लाख शिवसताक्षी नगरपालिकाको सहयोग रहेको छ ।

कार्यक्रम श्री अरुणोदय आधारभूत विद्यालयकी प्रधानाध्यापक ताराकुमारी लावतीले शैक्षिक सुधारका लागि नगर तथा वडाले खेलेको भूमिका महत्वपूर्ण रहेको बताइन् । उनले आधारभूत तहका विद्यालयहरुमा धेरै उपकरण तथा सामाग्रीहरुको आवश्यकता रहेको छ र तर समय समयमा नगर तथा वडाको सहयोगले शैक्षिक सुधारमा केही टेवा पुगेको जानकारी दिइन् ।

कार्यक्रममा झिलझिले माविका व्यवस्थापन समितिका अध्यक्ष पर्शुराम ढुंगाना, शिक्षक विष्णु सुब्बा लगायतले शुभकामना मन्तव्य राखेका थिए । कार्यक्रमको सञ्चालन वडाका कर्मचारी कुमारसिं साँवाले गरेका थिए ।

The post शिवसताक्षी–८ ले दियो चार सामुदायिक विद्यालयलाई ल्यापटप र प्रिन्टर appeared first on Jhapa Online.