भद्रपुर झापा गोल्डकप : आज उपाधिका लागि झापा–११ र भद्रपुर ब्लेजर्स आमनेसामने, दर्शकले कसलाई देलान् साथ

झापा, १६ फागुन । भद्रपुर झापा गोल्डकप अन्तर्राष्ट्रिय आमन्त्रण नकआउट फुटबल प्रतियोगितामा आज उपाधिका लागि झापा–११ र भद्रपुर ब्लेजर्स फाइनल खेल खेल्दैछन् ।

दुवै झापाली टीम फाइनलमा पुगेका छन् । जसले जिते पनि उपाधि झापामै रहने छ । पहिलो सेमिफाइनल खेलमा आयोजक भद्रपुर ब्लेजर्सले काउर्न बाजार प्रगति संघ बंगलादेशलाई टाइब्रेकरमा हराउँदै उपाधि नजिक पुगेको थियो भने अन्तिम सेमिफाइनल खेलमा झापा ११ ले विदेशी टोली भुटानको डागा युनाइटेड एफसीलाई ३–१ गोल अन्तरले हराउँदै उपाधिनजिक पुगेको थियो ।

बिहीबार आयोजित प्रिम्याच कन्फ्रेन्समा दुवै टीमले आफ्नो जीत हुने दाबी गरेका छन् । दुवै झापाली टीम भएकाले कुन टिमलाई सपोर्ट गर्ने भन्नेमा दर्शक समेत अन्योलमा छन् ।

सौर्य एअर ओम साई पाथिभरा हस्पिटल गम्भीर राई स्मृति संस्करण अन्तर्राष्ट्रिय आमन्त्रण नकआउट फुटबल प्रतियोगिताको विजेताले नगद १३ लाख, आकर्षक ट्रफी र मेडल र उपविजेताले नगद ७ लाख, ट्रफी र मेडल प्राप्त गर्नेछन् । प्रतियोगिताभरिको सर्वोत्कृष्ट खेलाडी प्लेयर अफ द टुर्नामेन्टले नगद एक लाख पाँच हजार रुपैयाँ पाउनेछ ।

त्यस्तै, उत्कृष्ट गोलकिपर, उच्च गोलकर्ता, उदीयमान खेलाडी र प्रशिक्षकले नगद २५ हजार पाउने महासचिव जीवनकुमार श्रेष्ठले बताए । प्रत्येक खेलको प्लेयर अफ द म्याचलाई नगद २१ हजार रुपैयाँ दिइनेछ ।

The post भद्रपुर झापा गोल्डकप : आज उपाधिका लागि झापा–११ र भद्रपुर ब्लेजर्स आमनेसामने, दर्शकले कसलाई देलान् साथ appeared first on Jhapa Online.