तराई मधेस केन्द्रित दलले संयुक्त मोर्चा बनाउने, ८ सदस्यीय कार्यदल गठन

काठमाडौं । तराई मधेस केन्द्रित आठ दलले संयुक्त मोर्चा बनाउने भएका छन् । ती दलको आज बसेको बैठकले मोर्चा बनाउने निर्णय गरेको हो ।

मोर्चाको नाम, विधान आचारसंहिता लगायतका विषयमा टुङ्गो लगाउन ८ सदस्यीय कार्यदल गठन गरेको छ ।

कार्यदलमा जसपा नेपालका मनिषकुमार सुमन, लोसपाका लक्ष्मणलाल कर्ण, जसपाका इस्तियाक राई, जनमत पार्टीका डा शरदसिंह यादव, नागरिक उन्मुक्ति पार्टीका गङ्गाराम चौधरी, जनता प्रगतिशील पार्टीका शिवजी यादव, राष्ट्रिय मुक्ति पार्टी नेपालका केशव झा र तमलोपाका बृजकिशोर सिंह छन् ।

कार्यदलले भोलिदेखि नै काम थालेर संयुक्त मोर्चाको अवधारणालाई अन्तिम रूप दिने जसपा नेपालका नेता सुमनले बताए ।

उनकाअनुसार बैठकमा सरकारले ल्याएका विभिन्न अध्यादेशबारे समेत छलफल भएको छ । भूमिसम्बन्धि अध्यादेशमा आफूहरूको धेरै चासो रहेको उनले बताए ।