हाम्रा नागरिकलाई अवैध विदेशीको खतरा बढ्दै गएको छ : अमेरिकी राष्ट्रपति ट्रम्प

काठमाडौं । अमेरिकी राष्ट्रपति डोनाल्ड ट्रम्पले हालै क्यानडा र मेक्सिकोबाट आयात हुने सामानमा २५ प्रतिशत र चीनमा १० प्रतिशत कर लगाउने आदेशमा हस्ताक्षर गरेका छन् ।

शनिबार राति राष्ट्रपति ट्रम्पले क्यानडा, मेक्सिको र चीनमा कर लगाएको बताएका थिए । उनले यसको कारण बताउदै ट्रुथ सोसलमा पोस्ट पनि गरेका छन् ।

ट्रम्पले यो निर्णय इन्टरनेसनल इमर्जेन्सी इकोनोमिक पावर्स एक्ट (आईईईपीए) मार्फत लिइएको बताएका छन् ।

उनले लेखेका छन्, ‘किनभने हाम्रा नागरिकलाई अवैध विदेशीको खतरा बढ्दै गएको छ । फेन्टालिन र अन्य घातक औषधिहरूका कारण हाम्रा नागरिकको ज्यान गइरहेको छ ।’

राष्ट्रपतिको रूपमा सबैको सुरक्षा सुनिश्चित गर्नु आफ्नो कर्तव्य रहेको ट्रम्पले बताएका छन् ।

‘हामीले अमेरिकीहरूको सुरक्षा गर्न आवश्यक छ, र राष्ट्रपतिको रूपमा सबैको सुरक्षा सुनिश्चित गर्नु मेरो कर्तव्य हो,’ उनले भनेका छन्, ‘मैले यसअघि हाम्रो सीमानामा अवैध विदेशी र लागुपदार्थको बाढी रोक्ने वाचा गरेको थिएँ । यसैका लागि अमेरिकीहरूले अत्यधिक मतदान गरेर मलाई जिताएका हुन् ।’

क्यानडा, मेक्सिको र चीनमा बढाइएको कर आजदेखि लागू हुने ट्रम्पको घोषणा