बिर्तामोडमा धमाधम एपीभी खोप लगाइँदै

बिर्तामोड, २५ माघ । किशोरीहरुको लागि पाठेघरको मुखको क्यान्सरविरुद्धको ‘एचपिभी’ खोप अभियान बिर्तामोडमा
धमाधम सञ्चालन भइरहेको छ ।

विद्यालय र विद्यालय बाहिरका किशोरीहरुका लागि माघ २२ गतेदेखि सुरु भएको यस अभियानमा खोपकर्मी र स्वयमसेवक गरि १०४ जना जनशक्ति खटिएको नगरको स्वास्थ्य शाखाले जनाएको छ ।

माघ २७ गतेसम्म सञ्चालन हुने यस अभियानमा आजसम्मको तथ्याङ्क अनुसार ७५ प्रतिशत खोप लगाइसकिएको बिर्तामोड नगर अस्पतालका जनस्वास्थ्य निरिक्षक तथा कार्यक्रमका फोकल पर्सन गणेश रिजालले जानकारी दिनुभयो ।

बिर्तामोडमा बिद्यालयका ६ हजार ४३३ र बाहिरका १ हजार १३९ गरी कुल ७ हजार ५७२ जनालाई खोप लगाईने नगरका स्वास्थ्य शाखाका प्रमुख राजिब बिष्टले जानकारी दिनुभयो । यसका लागि विद्यालयमा ५७ र स्वास्थ्य संस्थामा ११ वटा गरि ६८ वटा खोप केन्द्र स्थापना गरेको जनाईएको छ ।

सरकारको कार्यक्रम अनुसार विद्यालयमा अध्ययनरत कक्षा ६ देखि १० सम्म र बाहिर रहेका १० बर्षदेखि १४ वर्षसम्मका किशोरीलाई ुएचपिभी’ खोप लगाउने कार्य सञ्चालन भईरहेको हो ।

स्वास्थ्य केन्द्रमा कुनै कारणले खोप लगाउन छुटेकाहरुलाई माघ २७ गते १० वटै वडामा रहेका स्वास्थ्य संस्थामा लगाईने स्वास्थ्य शाखा प्रमुख बिस्टले जानकारी दिनु भयो ।

बिर्तामोड नगरपालिकाकी नगर प्रमुख पवित्रा महतारा प्रसाईले लक्षित समुहले खोप अनिबार्य लगाउन आग्रह गर्नु भयो । उहाँले अभियान सफल बनाउन जनप्रतिनिधि, कर्मचारी सबै लाग्नु पर्ने बताउनु भयो ।

The post बिर्तामोडमा धमाधम एपीभी खोप लगाइँदै appeared first on Jhapa Online.