फेसबुकले अब प्रयोगकर्ताका लाइभ भिडिओ ३० दिनपछि मेटाउने

काठमाडौं । फेसबुकले १९ फेब्रुअरीदेखि आफ्नो प्लेटफर्ममा अपलोड गरिएका लाइभ भिडियोहरू ३० दिनपछि मेटाउने नीति लागू गरेको छ ।

यो नयाँ नियमअनुसार प्रयोगकर्ताले लाइभ गरेपछि ती भिडिओलाई रिल्समा परिणत नगरे वा ३० दिनभित्र डाउनलोड नगरेमा मेटिनेछन् ।

यदि तपाईं भिडिओ डाउनलोड गर्न चाहनुहुन्छ भने ३० दिनको अवधि समाप्त हुनुअघि त्यसलाई डाउनलोड गर्नुपर्नेछ ।

फेसबुकले यस परिवर्तनको कारण पनि जानकारी दिएको छ । “अधिकांश लाइभ भिडिओ हेर्नेहरू पहिलो केही हप्तामा नै हुन्छन् र सञ्चय नीतिहरूलाई उद्योगका मापदण्डसँग मेल खाने गरी अद्यावधिक गर्न चाहन्छौँ,” फेसबुकले भनेको छ ।

यो नीति लागू भएपछि पहिले नै ३० दिन पुरानो भएका सबै लाइभ भिडिओ पनि मेटिनेछन् । यद्यपि, फेसबुकले प्रयोगकर्ताहरुलाई इमेल र एपमा सूचनाहरू पठाउने छ र पुराना भिडिओहरू मेटाउनुअघि ९० दिनको समय दिनेछ ।

फेसबुकले प्रयोगकर्ताहरूलाई तिनका भिडिओहरू बचाउनका लागि विभिन्न डाउनलोड उपकरणहरू उपलब्ध गराएको छ ।

प्रयोगकर्ताले व्यक्तिगत रूपमा वा सबै भिडियो एकैचोटि डाउनलोड गर्न सक्नेछन् । साथै, उनीहरूले भिडिओलाई क्लाउड सेवाहरू जस्तै ड्रपबक्स वा गुगल ड्राइभमा पनि स्थानान्तरण गर्न सक्छन् ।

यदि प्रयोगकर्ताहरूलाई भिडिओ डाउनलोड गर्नको लागि समय नभएमा फेसबुकले उनीहरूलाई भिडिओ मेटिनुअघि ६ महिनासम्मको समय स्थगित गर्ने विकल्प पनि दिनेछ । यसका लागि प्रयोगकर्ताले सूचना खोल्दै “अधिक जान्नुहोस्” विकल्पमा जान र “स्थगित गर्नुहोस्” चयन गर्नुपर्नेछ ।

फेसबुकले भिडिओको डाउनलोड र स्थानान्तरण प्रक्रिया सरल बनाउन विभिन्न मार्गदर्शनहरू प्रदान गरेको छ, जसले प्रयोगकर्तालाई उनीहरूको लाइभ भिडिओ सुरक्षित राख्न मद्दत पुर्‍याउनेछ ।