समूह विजेता बन्ने प्रतिस्पर्धामा न्युजिल्यान्ड र भारत

काठमाडौं । नवौं संस्करणको आईसीसी च्याम्पियन्स ट्रफी क्रिकेटको समूह चरणको अन्तिम खेलमा आज (आइतबार) न्युजिल्यान्ड र भारतबीच खेल हुँदैछ ।

यूएईको दुबई अन्तर्राष्ट्रिय रङ्गशालामा नेपाली समयअनुसार दिउँसो २ः४५ बजे यी दुई टोलीबीच समूह विजेता बन्ने प्रतिस्पर्धा हुनेछ । यो खेलको विजेता समूह ‘ए’को विजेता बन्नेछ ।

यदि पानी परेर खेल रद्ध भएमा नेट रनरेटका आधारमा न्युजिल्यान्ड समूह विजेता बन्नेछ । न्युजिल्यान्ड र भारतबीच हुने आजको खेल प्रतिस्पर्धात्मक हुने अपेक्षा गरिएको छ । किनकि प्रतियोगितामा हालसम्म दुवै टोलीले शतप्रतिशत नतिजा निकालेका छन् । दुवैले बङ्गलादेश र पाकिस्तानमाथि जित निकाल्दै ४–४ अङ्क जोडेका हुन् ।

समूह ‘ए’बाट न्युजिल्यान्ड र भारत सेमिफाइनलमा पुग्दा बङ्गलादेश र आयोजक पाकिस्तान बाहिरिएका छन् । बङ्गलादेश र पाकिस्तानबीच खेल भने वर्षाका कारण बाधक बनेको थियो । यसले गर्दा उनीहरूले १–१ अङ्क बाँडेका छन् ।

यस्तै समूह ‘बी’बाट दक्षिण अफ्रिका समूह विजेता बन्दै सेमिफाइनलमा पुग्दा अष्ट्रेलिया उपविजेता बनेको छ । समान ३ खेलबाट दक्षिण अफ्रिकाले ५ र अष्ट्रेलियाले ४ अङ्क जोडेका हुन् । दक्षिण अफ्रिकाले इङ्ल्यान्डसँगै अफगानिस्तानलाई पनि हराएको हो । अष्ट्रेलियासँगको खेल भने वर्षाका कारण अनिर्णित भएर १–१ अङ्क बाँडिएको थियो ।
यस्तै अष्ट्रेलियाले इङ्ल्यान्डलाई हराएको थियो भने दक्षिण अफ्रिका र अफगानिस्तानबीचको खेल भने वर्षाले प्रभावित बनेको थियो । यसले गर्दा अष्ट्रेलियाले दुवै टोलीसँग १–१ अङ्क बाँडेको थियो ।

यो समूहबाट अफगानिस्तान र इङ्ग्ल्यान्ड भने बाहिरिएका छन् । अफगानिस्तानले ३ अङ्क जोड्न सफल रहँदा इङ्ल्यान्ड भने अङ्विहीन रहेको छ । । नवप्रवेशी अफगानिस्ताने इङ्ल्यान्डलाई हराएको थियो । क्रिकेटको परम्परागत शक्ति मानिएको इङ्ल्यान्डले भने सबै खेल हार्यो ।

फाइनल प्रवेशका लागि समूह ‘ए’को विजेताले समूह ‘बी’को उपविजेतासँग प्रतिस्पर्धा गर्नेछ ।

यसैगरी समूह ‘बी’को विजेताले समूह ‘ए’को उपविजेतासँग भिडन्त गर्नेछ ।

समूह ‘बी’ विजेता दक्षिण अफ्रिकाले भारत वा न्युजिल्यान्ड प्रतिद्वन्द्वी पाउने छ । उपविजेता अष्ट्रेलियाले पनि यिनै दुईमध्ये एक प्रतिद्वन्द्वी पाउने छ ।

च्याम्पियन्स ट्रफी : सेमिफाइनल खेल्ने चार टोलीको टुङ्गो लाग्यो