पूर्वखेलाडी इस्कोले निर्णायक गोल गर्दा साविक विजेता रियल मड्रिड पराजित

काठमाडौं । स्पेनिस ला लिगा फुटबलमा साविक विजेता रियल मड्रिड रियल बेटिससँग पराजित भएको छ ।

आइतबार बिहान भएको खेलमा सर्वाधिक ३६ पटकको विजेता रियल घरेलु टोली बेटिससँग २–१ गोलअन्तरले स्तब्ध बनेको हो ।

इस्कोले आफ्नोपूर्व क्लबविरुद्ध विजयी गोल गर्दै बेटिसको जित सुनिश्चित गरेका हुन् ।

खेलको १०औं मिनेटमा ब्राहिम डियाजले गोल गर्दै रियललाई अग्रता दिलाए ।

तर ३४औं मिनेटमा इस्कोको कर्नरबाट जोनी कार्डोसोले हेडरमार्फत बराबरी गोल गरे । यसपछि ९ वर्ष रियलमा बिताएका बेटिसका कप्तान इस्कोले ५४औं मिनेटमा पेनाल्टीमार्फत गोल गरेपछि खेल बेटिसले जितेको हो ।

योसँगै ला लिगाको जारी सिजनमा कार्लो एन्सेलोटीको टोलीले चौथो पटक पराजय भोगेको छ ।

रियल अङ्क तालिकाको तेस्रो स्थानमा छ । उसले २६ खेलबाट ५४ अङ्क जोडेको छ ।

ला लिगा : सर्वाधिक एसिस्ट गर्नेमा १७ वर्षीय यमाल अगाडि