वकिलको पोसाक कालो र डाक्टरको सेतो किन हुन्छ ?

एजेन्सी । के तपाईंले कहिल्यै ध्यान दिनुभएको छ कि वकिलहरू किन सधैं कालो कोटमा देखिन्छन् र डाक्टरको ड्रेस किन सेतो कोट हुन्छ ? यी दुवै पोसाकको पछाडि एक गहिरो सोच र इतिहास लुकेको छ ।

आज हामी तपाईंलाई बताउनेछौँ कि यी विशेष रङ्गका कोटको के रहस्य छ र किन महत्त्वपूर्ण छन् । हरेक कुराको एउटा अर्थ हुन्छ र यी कोट लगाउनुको पछाडि पनि केही यस्तै छ । सायद यसपछि तपाईं यी दुवै पेसाकर्मीहरूको पोसाक देखेर फरक दृष्टिकोणबाट सोच्न थाल्नुहुनेछ ।

कालो रङ्गलाई सधैँ गम्भीरता, शक्ति र सम्मानको प्रतीक मानिन्छ । त्यसैले वकिलहरूले आफ्नो पेशेवर जीवनमा कालो कोटको प्रयोग गर्छन् ।

इतिहासको कुरा गर्ने हो भने १७औं शताब्दीमा बेलायतका राजा चार्ल्स द्वितीयको मृत्युपछि वकिल र न्यायाधीशले कालो पोसाक लगाउन सुरु गरेका थिए । यो शोक व्यक्त गर्ने एक तरिका थियो । तर, बिस्तारै यो परम्परा बन्यो र यो आजसम्म जारी छ ।

यसबाहेक कालो रङ्गलाई न्याय, निष्पक्षता र गम्भीरतासँग जोडिन्छ । जब वकिलहरू कालो कोटमा अदालत कक्षमा प्रवेश गर्छन्, यसले उनीहरूले उठाएका मुद्दाहरूमा गम्भीरता र इमानदारिताको भावना प्रदर्शन गर्छ ।

कालो कोटमा एउटा विशेष कुरा के छ भने कडा र शक्तिशाली व्यक्तित्वलाई प्रदर्शन गर्ने यो रङ्गले वकिलको कामको गम्भीरतालाई स्पष्ट रूपमा देखाउँछ । अनि कालो रङ्गमा कुनै पनि दाग चाँडै देखिँदैन, जसले वकिलहरूलाई सधैँ पेशेवर रूपमा सिद्ध देखिन्छन् ।

डाक्टरले किन सेतो कोट लगाउँछन् ?

अब जानौँ डाक्टरहरूको सेतो कोटको बारेमा जुन उनीहरूको पहिचान बनिसकेको छ । सेतो रङ्गलाई सधैँ शुद्धता, सफा र विश्वासको प्रतीक मानिन्छ ।

सेतो कोटको परम्पराको इतिहास पनि रोचक छ । १९औं शताब्दीको मध्यतिर जब चिकित्सा विज्ञान तीव्र विकास भयो र अस्पतालहरूमा सरसफाइमा ध्यान दिन थालियो, त्यसबेला डाक्टरहरूले सेतो कोट लगाउन सुरु गरे । सेतो रङ्गमा दाग चाँडै देखिन्छ, जसले डाक्टरहरूलाई सफा र स्वच्छताप्रति सचेत गराउँछ ।

सेतो कोटको अर्को ठूलो कारण हो विश्वास । जब बिरामीले सेतो कोट लगाएको डाक्टरलाई देख्छ, उसलाई विश्वास हुन्छ कि त्यो व्यक्तिले उसलाई सही उपचार दिन सक्छ । सेतो रङ्गको प्रभाव यति गहिरो हुन्छ कि यसले बिरामीहरूलाई मानसिक रूपमा पनि शान्ति र सुरक्षाको महसुस गराउँछ ।

सेतो रङ्गको अर्को पक्ष के हो भने यो स्वास्थ्य र शुद्धताको प्रतीक हो । अस्पताल र चिकित्सालयहरूमा सरसफाइको स्तर धेरै महत्त्वपूर्ण हुन्छ, र सेतो कोट यसलाई ध्यानमा राखेर लगाइन्छ ।

यसका साथै, सेतो कोटको पहिरनले डाक्टरलाई पेशेवर र विश्वसनीय देखाउँछ, जसले बिरामीहरूको विश्वास जित्न मद्दत गर्छ ।

वकिलहरूको कालो कोट र डाक्टरहरूको सेतो कोट केवल फेसन वा परम्परागत पोसाक होइनन्, यसलाई लगाउनुले एक गहिरो सोच र उद्देश्यलाई व्यक्त गर्छ । कालो कोटको कडा र गम्भीर देखिनुले न्यायप्रति सम्मान र निष्पक्षतालाई दर्साउँछ, जबकि सेतो कोट शुद्धता र विश्वासको प्रतीक हो ।