साता दिनभित्र तलब नपाए कडा आन्दोलन गर्ने स्थानीय तह कर्मचारी संघको चेतावनी

काठमाडौँ।

काठमाडौं महानगरपालिका ३ महिनादेखि प्रशासनिक नेतृत्वविहीन हुँदा कर्मचारीले तलब नपाएको, विकासे काम ठप्प भएकोप्रति स्थानीय तह कर्मचारी संघले आपत्ति जनाएको छ । स्थानीय तह कर्मचारी संघलेआज एक विज्ञप्ति जारी गर्दै समस्या समाधानको लागि नेतृत्व जिम्मेवार र गम्भीर बन्न आग्रह गरेका छन्।

विज्ञप्तिमा भनिएको छ, ‘सम्बन्धित पक्षसँग समन्वयात्मक तवरले समस्याको निकासको लागि पहल गनुपर्नेमा झनै समस्या लम्ब्याउने तवरले सामाजिक सञ्जालको माध्यमबाट उच्छृंखल, अवाञ्छित एवं उत्तेजित शब्दावली प्रयोग गरी थप समस्याको सृजना गर्न उद्दत देखिनुले समस्या हल गर्नतर्फ हैन, आ-आफ्नो दम्भ प्रदर्शन गर्नतर्फ अग्रसर देखिन्छ ।’

स्थानीय तहको प्रशासनिक र राजनीतिक नेतृत्व एकै सिक्काका दुई पाटा भएको स्मरण गराउँदै संघले एक-अर्का बीच विश्वास एवं सहयोग भएमात्र सेवा प्रवाहमा गतिशीलता तथा प्रभावकारिता हासिल गर्न सकिने जनाएको छ ।

महानगरमा विधि र प्रक्रियाबाट नभई व्यक्तिको मौखिक आदेश, निर्देशनबाट प्रशासन संयन्त्र संचालन गर्न खोज्दा समस्या आएको ठहरसहित संघले भनेको छ, ‘अनधिकृत व्यक्तिहरूबाट कर्मचारीहरूलाई त्रास एवं भयको वातावरण सृजना गरी कानूनसम्मत ढंगले कार्य गर्न पाउने अधिकारलाई कुण्ठित गराई जबर्जस्त आदेश लाद्ने पद्दतिले काठमाडौं महानगरपालिकामा दिनानुदिन झनै जरा गाड्दै गएको छ ।’

पारिश्रमिकविहीनताको कर्मचारीको समस्या एक हप्ताभित्र समाधान नगरे कडा आन्दोलनका कार्यक्रम घोषणा गरिने चेतावनीसहित संघले र उक्त परिस्थितिबाट सृजित परिणामको जिम्मेवार महानगरको नेतृत्व हुनुपर्ने चेतावनी दिएको छ ।