स्वर्गीय राजा वीरेन्द्रका निजी  चिकित्सक डा खगेन्द्रबहादुर श्रेष्ठको निधन 

काठमाडौं। 

वरिष्ठ चिकित्सक डा खगेन्द्रबहादुर श्रेष्ठको निधन भएको छ। ब्लुक्रस हस्पिटलका संरक्षक डाक्टर श्रेष्ठको ८९ वर्षको उमेरमा बिहीबार बिहान निधन भएको हो।

डा श्रेष्ठले सर्वसाधारणलाई मात्र नभई राजपरिवारमा समेत सेवा दिएका छन्। उनी तत्कालीन राजा वीरेन्द्रका निजी चिकित्सक समेत हुन्। उनी मुमा बडामहारानी रत्न राज्यलक्ष्मीदेवी शाहका पनि चिकित्सक हुन्। राजपरिवारको चिकित्सक रहेका कारण उनलाई शाही चिकित्सकको पदावधि पनि दिइएको छ।

डा श्रेष्ठको निधनले नेपालको चिकित्सा क्षेत्रमा ठूलो क्षति पुगेको  ब्लुक्रस अस्पतालले  जनाएको छ। अस्पतालले उनको निधनपछि दु:ख व्यक्त गर्दै स्वास्थ्य क्षेत्रमा उनले गरेको योगदान सदा सर्वदा उचित तथा सम्मानका साथ युग युगसम्म स्मरण रहनेमा विश्वसत रहेको जनाएको छ।

ललितपुरको कुपन्डोल निवासी डा श्रेष्ठको पार्थिव शरीरलाई श्रद्धाञ्जलिका लागि आज कुपण्डोलस्थित निवासमा राख्ने र शुक्रबार अन्तिम संस्कार गर्ने परिवारले जनाएको छ।

वीरेन्द्र युवराज हुँदादेखि नै चिकित्सकीय सेवा दिइरहेका उनले २०५३ सालमा औपचारिक रुपमा ‘शाही चिकित्सक’को उपाधि पाएका थिए। २०५८ जेठ १९ गते राज परिवार हत्याकान्ड भएपछि उनले सेवाबाट अवकाश लिएका थिए। उनी ६० वर्षे उमेर हद लागेर सेवाबाट ६ वर्षअघि नै रिटायर भइसकेका थिए, तर शाही चिकित्सकका रुपमा दुई–दुई वर्ष करार थप गर्दै सेवारत थिए। उनले केही समयअघि सम्म मुमा बडा महारानी रत्नलाई उपपचार सेवा दिइरहेका थिए।

यसबाहेक सिभिल एभिएसन अथोरिटी नेपालमा सिभिल एभिएसन मेडिकल एस्सेसर, खगेन्द्र स्पोर्ट्स फाउन्डेसनको संस्थापक अध्यक्ष, नेपाल लेप्रोसी रिलिफ एसोसिएसनमा वरिष्ठ उपाध्यक्षका रुपमा उनले जिम्मेवारी सम्हालिरहेका छन्।

१९९२ सालमा काठमाडौं जैशीदेवलमा जन्मेका डा श्रेष्ठको पढाइ राम्रै थियो। उनका काका पाटन हाइस्कुलका शिक्षक भएकाले उनको परिवार पनि त्यतै बस्थ्यो र उनले पनि त्यतै पढे। उनले २००७ सालमा प्रथम श्रेणीमा एसएलसी पास गरेका थिए। उनले सन् १९६१ मा भारत, लखनउस्थित किङ जर्ज मेडिकल कलेजबाट एमबिबिएस अध्ययन गरेका हुन्।

उनका मामाले नेपालमा स्वास्थ्य लगायत अन्य सहयोगका लागि आइरहने प्रसिद्ध भूगोलशास्त्री तथा विकासविज्ञ टोनी हेगनलाई चिन्थे। उनलाई भर्खर डाक्टरी सकेर आएको भान्जालाई टोनी हेगनकै परियोजना अन्तर्गत काम लगाउने इच्छा जाग्यो। टोनी हेगनले एक वर्ष मुस्ताङमा रहेर खम्पा विद्रोहीको उपचार गरेपछि इन्टरनेसनल रेडक्रस सोसाइटीमा जागिर लगाउने वचन दिए। सोही योजना अनुसार डा श्रेष्ठ ११ महिनासम्म जोमसोममा बसेका थिए।

जोमसोम बस्दा नेपाली सेनाका हाकिमले उनको काम र जाँगर सेनाका लागि उपयुक्त हुने ठह्‍याइसकेका रहेछन् । त्यसैले डाक्टर खोजिरहेका सेनाका उच्च अधिकारी समक्ष उनको नाम सिफारिस भयो । २०१९ सालको सुरु तिर आर्मीबाट उनलाई बोलावट आयो। उनी आर्मीका उच्च अधिकारीलाई भेट्न पुगे। फिट शरीरवाला डा श्रेष्ठ आर्मीको जागिरमा तुरुन्तै ‘ओके’ भइहाले। उनले राति आर्मी अस्पतालमा ड्युटी र दिउँसो काठमाडौं मेडिकल हलमा प्राइभेट प्य्राक्टिस पनि गरेका थिए।

डाक्टर श्रेष्ठको निधन पछि नेपाल चिकित्सक संघले समेत दुख व्यक्त गरेको छ। संघले विज्ञप्ति जारी गर्दै इमान्दार र लगनशील अग्रज चिकित्सक गुमाउनु पर्दा चिकित्सक संघ अत्यन्तै मर्माहत भएको जनाएको छ।