शेर्पाबिनै सगरमाथा चढ्ने पहिलो नेपाली महिला बनिन् पार्वती

काठमाडौं । रसुवाको आमाछोदिङमो–४ की पार्वती जोशीले शेर्पाबिना नै सगरमाथा चढेर ऐतिहासिक सफलता हासिल गरेकी छन् । मे १९ मा सगरमाथाको शिखरमा पाइला टेक्दै यस्तो उपलब्धि हासिल गर्ने पहिलो नेपाली महिला बन्न सफल भएकी हुन् ।

पार्वतीको यो सफलता नेपाली पर्वतारोहण क्षेत्रमा एक ऐतिहासिक मोड साबित भएको छ । सगरमाथा आरोहणका क्रममा सामान्यतः अनुभवी शेर्पाहरूको सहयोग लिइन्छ, तर पार्वतीले सम्पूर्ण यात्रा स्वयंको योजना, मार्गनिर्देशन र साहसको भरमा सम्पन्न गरेकी हुन् ।

उनले अप्रिल २०, २०२५ मा काठमाडौंबाट यात्रा सुरु गरेकी थिइन् भने आरोहण गरिसकेर मे २४ मा फर्किएकी थिइन् । पर्वतारोहणका क्रममा उनले कुनै पनि सहायक शेर्पाविना यात्रा सम्पन्न गरेकी हुन् ।

१९९२ डिसेम्बर २४ मा जन्मिएकी पार्वती प्रारम्भदेखि नै खेलकुदप्रति रुचि राख्थिन् । राष्ट्रिय स्तरमा भलिबल खेलकी उनी ट्रेकिङप्रति पनि आकर्षित भइन् । Intrepid Travel नामक अन्तर्राष्ट्रिय ट्राभल कम्पनीमा प्रमाणित ट्रेकिङ गाइडको रूपमा कार्यरत जोशीले सन् २०१६ मा आधारभूत पर्वतारोहण तालिम लिएकी थिइन् भने सन् २०२० मा एडभान्स कोर्स पनि पूरा गरेकी हुन् ।

उनी भन्छिन्, “जब पर्वतारोहणको तालिम लिएँ, तब लाग्यो अब सगरमाथा पनि चढ्न सक्छु ।”