पतञ्जली प्रकरण : प्रतिवादी बितेपछि परिवारलाई बिगो दाबी

काठमाडौं । काभ्रेको पतञ्जली योगलाई हदबन्दीभन्दा बढीको जग्गा सट्टपट्टा गर्न दिएको प्रकरणका दुईजना प्रतिवादी बितेपछि उनीहरूका परिवारलाई बिगो मागदाबी गर्दै मुद्दा दायर भएको छ । मृत्यु भइसकेका पूर्वगृहमन्त्री तथा तत्कालीन मुख्य सचिव माधवप्रसाद घिमिरे र तत्कालीन भूमिसुधार तथा व्यवस्थामन्त्री डम्बर श्रेष्ठका परिवारमाथि बिगो माग गरिएको हो ।

तत्कालीन मुख्यसचिव घिमिरेको सट्टा उनकी श्रीमती कमला घिमिरेलाई प्रतिवादी बनाइएको छ । यस्तै, तत्कालीन भूमिसुधार तथा व्यवस्थामन्त्री श्रेष्ठको हकमा उनका छोरा सन्तोष श्रेष्ठलाई प्रतिवादी बनाइएको अख्तियार दुरुपयाेग अनुसन्धान आयाेगको आरोपपत्रमा उल्लेख छ ।

उनीहरूका परिवारलाई जनही १८ करोड ५८ लाख ५० हजार रुपैयाँ बिगो माग गरिएको छ ।

पतञ्जली योगलाई हदबन्दीभन्दा बढीको जग्गा सट्टपट्टा गर्न दिएको प्रकरणमा पूर्वप्रधानमन्त्री माधवकुमार नेपालसहित ९३ जनाविरुद्ध बिहीबार विशेष अदालत मुद्दा दायर भएको हो ।

नासिकास्थान, साँगा, महेन्द्रज्योतिमा कम्पनी संचालनको लागि हदबन्दीभन्दा बढी जग्गा खरिद गरेको, उक्त जग्गा कम मूल्यमा किनेर बढी मूल्यमा बेचबिखन गरेको सम्बन्धमा सार्वजनिक सम्पत्ति हानी नोक्सानी गरी भ्रष्टाचार गरेको आरोपपत्रमा उल्लेख छ ।

पूर्वप्रधानमन्त्री नेपालसँग पनि १८ करोड ५८ लाख ५० हजार रुपैयाँ नै बिगो माग गरिएको छ ।

पूर्वगृहमन्त्री घिमिरे सवार कार २०७३ साल असोजमा त्रिशूली नदीमा खस्दा उनीसहित तीन जनाको मृत्यु भएको थियाे ।

पतञ्जली जग्गा प्रकरण : माधव नेपाल र प्रेम सिंहसहित यी हुन् ९३ प्रतिवादी