स्नायु विज्ञानसम्बन्धी दुई दिने अन्तर्राष्ट्रिय सम्मेलन काठमाडौंमा शुरु

काठमाडौं ।

स्नायु विज्ञानसम्बन्धी अन्तर्राष्ट्रिय सम्मेलन ‘न्युरोकन– २’ काठमाडौंमा शुरु भएको छ ।
नेपालको आधुनिक स्नायु स्वास्थ्य विज्ञानका ‘पिता’ मानिने प्रा.डा. उपेन्द्र देवकोटाका ७ औं पुण्यतिथी पारेर उपेन्द्र देवकोटा फाउण्डेशनले ‘स्नायु विज्ञानको विकासक्रम एवं नवप्रवर्तन’ भन्ने मूल नारासहित स्नायु सम्बन्धी अन्तर्राष्ट्रिय सम्मेलन ‘न्युरोकन– २’ बुधवारबाट काठमाडौंमा शुरु भएको हो ।

फाउण्डेसनका अध्यक्ष प्रा.डा. मधु दीक्षितले प्रा.डा. उपेन्द्र देवकोटाले थालेको अनुकरणीय कार्यको निरन्तरताको लागि फाउण्डेसनले काम गरिरहेको बताइन् । सम्मेलनमा चिकित्सक, नर्स लगायत स्वास्थ्यकर्मीले प्राविधिक दक्षताका साथै सम्पर्क र सञ्जालमार्फत स्वास्थ्य सेवा अझै सुधार हुने विश्वास व्यक्त गरिन् ।

असार ४ र ५ गते हुने सम्मेलनमा स्नायु विज्ञानका विभिन्न विधा न्युरो सर्जरी, न्यूरो–मेडिसिन, न्युरो–रेडियोलोजी, न्युरो–इन्टरभेन्सन, न्युरो–ओटोलोजी, न्युरो–एनेस्थेसिया, न्युरो–साइक्याट्री, न्युरो नर्सिङ एवं पुनस्र्थापनाका बारेमा देश तथा विदेशका विशेषज्ञ, चिकित्सकहरुले कार्यपत्र प्रस्तुत हुने आयोजक समितिका सभापति डा. सुरेश थुलुङले जानकारी दिए ।

बुधबार शुरु भएको सम्मेलनमा अमेरिकाको बोस्टन चिल्ड्रन अस्पताल (हावर्ड युनिभर्सिटी), लण्डनको किङ्स कलेज, भारतको अल इण्डिया इष्टिच्युट अफ मेडिकल साइन्सेज र क्रिस्टियन मेडिकल कलेज, भेलोरसहित इजिप्ट, फ्रान्स, पाकिस्तान लगायत देशका विशेषज्ञ चिकित्सक सहभागी भएर २५ वटा सत्रमा १ सय ३५ वटा कार्यपत्र प्रस्तुत गर्नुका साथै त्यसबारेमा छलफल र विमर्श गर्नेछन् ।

बेलायतका डा. बसेल जेबियन, डा. फ्रान्सेस्को भर्गानी, डा. जोसे पेड्रो लाभाडोर, भारतका डा. आनन्द बाल सुब्रमनियम र डा. आदित्य गुप्ता लगायत ३१ जना विज्ञहरुले स्नायुको बनोट, फङ्कसनल न्युरोसर्जरी, इन्डोस्कोपबाट ढाड र दिमागको शल्यक्रिया, न्युरो इन्डो भास्कुलर तालिमका साथै न्युरोलोजीको वोटुलिन्म टक्सिनको प्रयोगबारे कार्यपत्र साथै अनुभव आदानप्रदान हुने सम्मेलनको वैज्ञानिक समितिका संयोजक डा. सुरेश विश्वकर्माले जानकारी दिए ।

स्ट्रोक, पार्किन्सन, छारेरोग, अल्जाइमर जस्ता रोगहरू बढ्दो क्रममा भएकाले समयमै पहिचान र उपचारका विधि माथि विमर्श गर्न यो सम्मेलन महत्वपूर्ण हुने विश्वास आयोजकको छ ।सम्मेलनपूर्व असार २ र ३ गते अस्पताल परिसरमा नै ‘प्रि–कन्फरेन्स’ आयोजना गरिएको थियो । सम्मेलन पूर्व नै हुने मानव शवको प्रयोगात्मक सीप कार्यशालाका साथै नर्सहरुको लागि एड्भान्स कार्डियाक लाइफ सपोर्ट तालिम आयोजना गरिएको प्रमुख कार्यकारी अधिकृत मिलन गुरुङले जानकारी दिए ।

उपेन्द्र देवकोटा फाउण्डेशनले वरिष्ठ स्नायु शल्यचिकित्सक प्रा. डा. डेविड टेरेन्स होपलाई उपेन्द्र देवकोटा पुरस्कार प्रदान गरेको छ ।

फाउण्डेशनले आयोजना गरेको ‘न्युरोकन– २’ को औपचारिक कार्यक्रममा होपलाई पुरस्कार प्रदान गरिएको हो । बेलायतको किविन्स मेडिकल सेन्टर, नटिङहम युनिभर्सिटीमा वरिष्ठ स्नायु शल्यचिकित्सकबाट सेवा निवृत भएका होपले नेपालमा १५ बर्षभन्दा बढी समयदेखि स्नायु शिक्षा प्रदान गर्न मद्धत गर्दै आएका छन् । प्रा. डा. उपेन्द्र देवकोटाका सहकर्मी समेत रहेका होपले वीर अस्पताल, नाम्स देखि न्युरो अस्पताल बाँसबारीमा समेत सेवा प्रदान गरेका थिए ।

कार्यक्रममा काठमाडौं विश्वविद्यालयका उपकुलपति प्रा.डा. अच्युत वाग्ले, स्वास्थ्य मन्त्रालयको नीति, योजना तथा अनुगमन महाशाखा प्रमुख डा. कृष्णप्रसाद पौडेल, उपेन्द्र देवकोटा फाउण्डेशनका अध्यक्ष प्रा.डा. मधु दीक्षित देवकोटा, सम्मानिन्त व्यक्तित्व प्रा.डा. होप, आयोजक समितिका संयोजक डा. सुरज थुलुङ, सचिव डा. सागर कोइराला लगायतले आधुनिक स्नायु शल्यचिकित्साको क्षेत्रमा प्रा.डा. उपेन्द्र देवकोटाले गरेको योगदानबारे चर्चा गरेका थिए ।