‘इरानको आणविक स्थल नष्ट भएको छैन’ भन्ने रिपोर्ट आएपछि ट्रम्पले सेयर गरे भिडिओ

काठमाडौं । ‘इरानको आणविक कार्यक्रम नष्ट नभएको‘ भन्ने रिपोर्ट आएपछि अमेरिकी राष्ट्रपति डोनाल्ड ट्रम्पले सामाजिक सञ्जालमा एउटा भिडि‌ओ सेयर गरेका छन् ।

ट्रम्पले ट्रुथ सोसलमा लगभग ६० सेकेन्डको भिडिओ सेयर गरेका छन् । यस भिडिओमा बी-२ बमवर्षक लडाकु विमानहरू आकाशमा उडिरहेको र धेरै बम खसालिरहेको देखिन्छ ।

भिडिओमा एउटा गीत बजिरहेको छ, जसमा “बम इरान” शब्दहरू बारम्बार दोहोरिन्छ ।

पेन्टागनको चुहावट भएको प्रारम्भिक गुप्तचर मूल्याङ्कन प्रतिवेदनले इरानको आणविक स्थलहरूमा अमेरिकी आक्रमणले इरानी आणविक कार्यक्रमलाई नष्ट नगरेको दाबी गरेको छ, बरु आक्रमणले केही महिना मात्र ढिलाइ गरेको छ ।

ट्रम्पले यो पनि भनेका छन्, “सीएनएन र न्यूयोर्क टाइम्सले नक्कली समाचार फैलाइरहेका छन् । उनीहरू दुवैले इतिहासको सबैभन्दा सफल सैन्य आक्रमणहरू मध्ये एकलाई बदनाम गर्न खोजिरहेका छन् । इरानको आणविक स्थलहरू पूर्ण रूपमा ध्वस्त पारिएको छ । जनताले न्यूयोर्क टाइम्स र सीएनएनलाई दोष दिइरहेका छन् ।”