भारतका शुभांशु शुक्लासहित चारजना यात्री अन्तर्राष्ट्रिय अन्तरिक्ष स्टेसनतर्फ

काठमाडौं । भारतका शुभांशु शुक्ला र अन्य तीन अन्तरिक्ष यात्री अन्तर्राष्ट्रिय अन्तरिक्ष स्टेसन (आईएसएस) तर्फ लागेका छन् । उनीलाई बोकेको एक्सियम–४ मिसन नामक बुधबार भारतीय समयअनुसार दिउँसो १२ बजे आईएसएसतर्फ प्रक्षेपण गरिएको थियो ।

जसमा शुक्लासँगै आईएसएस जानेहरूमा पोल्यान्डका स्लाभोज अजनान्स्की विस्निव्स्की, हंगेरीका टिबोर क्यापु र अमेरिकाकी पेगी ह्विटसन रहेको बीबीसी हिन्दीको समाचारमा जनाइएको छ ।

प्राविधिक त्रुटि र अन्य समस्याका कारण यो मिसन पहिले पनि धेरै पटक स्थगित गरिएको थियो ।

एक्सियम–४ मिसन एक व्यावसायिक अन्तरिक्ष उडान हो । ह्युस्टनमा आधारित कम्पनी एक्सियम स्पेसले यो मिसन सञ्चालन गरिरहेको छ ।

अन्तरिक्ष यात्रीहरू त्यहाँ दुई हप्ता बस्ने नासाले जनाएको छ ।

यसअघि सन् १९८४ मा रुसी मिसनअन्तर्गत अन्तरिक्षमा जाने पहिलो भारतीय राकेश शर्मा थिए ।

आईएसएसमा उडान भरेपछि शुक्लाले ४० वर्षपछि भारतीय फेरि अन्तरिक्षमा पुगेको र यो एउटा अद्भुत यात्रा भएको बताएका छन् ।

भारतीय जनतालाई उनले भनेका छन्, ‘म चाहन्छु कि तपाईंहरू सबै मेरो यात्राको हिस्सा बन्नुहोस् । आउनुहोस्, हामी सबै मिलेर भारतको मानव अन्तरिक्ष कार्यक्रमलाई अगाडि बढाऔं ।’