धनुषामा बालिकाको हत्या, आरोपी फरार

जनकपुरधाम । धनुषामा एक बालिकाको हत्या भएको छ भने दुई जना घाइते भएका छन् ।

जनकपुरधाम उपमहानगरपालिका–४ कटैयाचौरी नजिकै सोमबार राति बटेश्वर गाउँपालिका-५ का दिनेश यादवकी १४ वर्षीया छोरी अञ्चलीको धारिलो हतियार प्रयोग गरी हत्या भएको पाइएको मधेश प्रदेशका प्रहरी प्रमुख उमाप्रसाद चतुर्वेदीले जानकारी दिए ।

घटनामा अञ्चलीकी आमा ३६ वर्षीया आशा र आशाकी १५ वर्षीया भतिजी राधा घाइते भएका छन् । आशाको टाउको र शरीरको विभिन्न भागमा र राधाको दाहिने घुँडा र दाहिने हातमा चोट लागेको छ ।

उनीहरुको प्रादेशिक अस्पताल जनकपुरमा उपचार भइरहेको डीआईजी चतुर्वेदीले बताए ।

हत्याको आरोप धनुषाको क्षीरेश्वरनाथ नगरपालिका–९ इच्छापुरका ३५ वर्षीय रामबाबु साहमाथि लागेको छ । उनी घटनापछि फरार छन् । घटनाको अनुसन्धान भइरहेको र फरार व्यक्तिको खोजी भइरहेको प्रहरीले जनाएको छ ।