संघ र प्रदेश सरकारले बजेट रोकेपछि गाउँपालिका आफैँ अस्पताल भवन बनाउँदै
काठमाडौं । एमाले अध्यक्ष केपी शर्मा ओली नेतृत्वमा बनेको सरकारले हरेक पालिकामा कम्तीमा एउटा १५ शय्याको अस्पताल बनाउने कार्यक्रम ल्यायो ।
एमाले अध्यक्ष केपी शर्मा ओलीले देश भरिका अस्पतालको एकै पटक एकैदिन भर्चुअल माध्यमबाट शिलान्यास पनि गर्नुभयो । अस्पताल भवन शिलान्यास गरे लगत्तै केपी ओली सरकार ढल्यो ।
ओली सरकार ढलेपछि शिलान्यास गरिएका अस्पताल भवनको बजेट पनि कटौती भयो । नयाँ सरकारले ओलीले ल्याएको सो कार्यक्रमलाई निरन्तरता दिएन ।
संघ र प्रदेश सरकाको आर्थिक सहयोगबाट अस्पताल निर्माण सम्पन्न हुन्छ भनेर निर्माण कार्य थालेका अधिकांश स्थानीय तहका अस्पतालको निर्माण कार्य अलपत्र भयो । कतिपय अस्पताल भवनको शिलान्यास भएर निर्माण कार्य अघि बढेकै छैन । कतिपयले जग राखेका छन् । कतिपयको निर्माण केही अघि बढेर अलपत्र परेको छ ।
रामेछापको खाँडादेवी गाउँपालिकामा निर्माण सुरु भएको १५ बेडको अस्पताललाई संघीय र प्रदेश सरकारले भवन निर्माणको बजेट नदिएपछि गाउँपालिका आफैँले निर्माण कार्य अघि बढाएको छ ।
सो गाउँपालिकाको गोगनपानीमा निर्माण सुरु गरिएको अस्पताल भवन निर्माणको लागि माथिल्ला सरकारले पैसा नदिए पनि गाउँपालिकाले आफैँ निर्माणको काम अघि बढाएको गाउँपालिका अध्यक्ष ज्ञानकुमार श्रेष्ठले बताउनुभयो ।
३ करोड ७२ लाखको लागतमा बन्न लागेको सो अस्पताल भवन निर्माणको जिम्मा आत्रेय जेबीलाई दिएको भए पनि सो कम्पनीले समयमा काम नगरिदिएको कारण केही समस्या भएको उहाँले बताउनुभयो । अर्को वर्षसम्म काम सम्पन्न गरेर सोही भवनबाट अस्पतालको सेवा सञ्चालन गरिने श्रेष्ठले बताउनुभयो ।
गाउँमा नै अस्पताल बनेमा गाउँमा बस्ने मानिसलाई निक्कै सहयोग हुने स्थानीय इन्द्रसिंह तामाङ बताउनुहुन्छ । छिटोभन्दा छिटो अस्पताल भवन बनाइ सेवा सञ्चालन गर्नुपर्ने उहाँले बताउनुभयो । अस्पताल भवन छिटो बनेर सेवा प्रवाह गरे उपचारको लागि खर्च अभावमा काठमाडौं जान नसक्नले उपचार नपाएर मर्नुपर्ने दिन नआउने उहाँको भनाइ छ ।
What's Your Reaction?
