संखुवासभा जिल्लामा चिनियाँहरूको किन भीड ?

पर्यटक भिसामा नेपाल भ्रमणमा आएका चिनियाँहरू संखुवासभा जिल्ला अन्तर्गतको किमाथाङ्कामा रुद्राक्ष, जडीबुटी, मरेका वन्यजन्तुको टुक्रा, सुन र अमेरिकी डलर तस्करीका साथै ठगी र आर्थिक अपराधमा संलग्न हुने गरेको पाइएको छ । किमाथाङ्कामा चिनियाहरू संख्या डरलाग्दो रुपमा बढ्दै गएकाले संखुवासभाको खाद्वारी र तुम्लिङटारका होटल तथा लजहरु आफ्नो क्षमताभन्दा बढी भार बहन गर्न बाध्य भएका  छन् । उनीहरु  भाडाको घरमा समेत बस्दै आएका छन् ।

जिल्ला प्रशासन कार्यालयले समेत यस बिषयलाई गम्भीरतापुर्वक लिदै सतर्कता बढाएको एक कर्मचारीले बताएको छ। यस सम्बन्धमा किमाथाङ्का र संखुवासभाका अन्य स्थानमा सशस्त्र प्रहरी बलको सतर्कता र गस्ती बढाउन जिल्ला समन्वय समितिको बैठक बसेको थियो । बीओपीमा जनशक्ति बढाउन, भन्सार कार्यालय स्थापना गरी प्रभावकारी बनाउन सम्बन्धित उच्च निकायसँग समन्वय गर्ने निर्णय पनि भएको छ ।

विगतमा, नेपाल प्रहरीले 23 डिसेम्बर 2019 मा काठमाडौंबाट 122 चिनियाँ नागरिकहरूलाई "शङ्कास्पद" गतिविधिहरूको लागि पक्राउ गरेको थियो, जसमा अधिकारीहरू भन्छन्, अनलाइन जुवा, वित्तीय ठगी, साइबर अपराध र भिसा नियमहरू उल्लङ्घन समावेश छन्।

द सन्डे गार्डियनको प्रश्नको जवाफ दिँदै, नेपाल प्रहरीका एक शीर्ष अधिकारीले यी गिरफ्तारहरू चिनियाँ सरकारको दबाबमा गरिएको र पक्राउ परेकाहरू चिनियाँ सरकारको विरुद्धमा बोल्ने "विरोधी" थिए भन्ने आरोप अस्वीकार गरे।

सन् २०१९ को अक्टोबरमा चिनियाँ राष्ट्रपति सी चिनफिङको नेपाल भ्रमणका क्रममा नेपाल र चीनले अपराध सम्बन्धी पारस्परिक कानुनी सहायता सम्झौतामा हस्ताक्षर गरेका थिए जसको फलस्वरूप नेपालले अब चीनको कानुन उल्लंघन गरेका तर नेपाली भूमिमा अपराध नगरेका चिनियाँ नागरिकलाई चीनलाई हस्तान्तरण गर्न सक्नेछ ।