सरकारको सय दिन : गज्जबको काम भएको सत्तारुढ दलको निष्कर्ष, विपक्षी दल छैनन् सन्तुष्ट

काठमाडौं । प्रधानमन्त्री केपी शर्मा ओलीको नेतृत्वमा वर्तमान सरकार गठन भएको १०० दिन भएको छ । नयाँ सरकारको १०० दिनको अवधिलाई ‘हनिमुन पिरियड’ भन्ने प्रचलन छ ।

अहिलेको सरकारले पनि यो पिरियड पार गरेको छ । अहिले हरेक दिन मन्त्रीहरुले सय दिनमा गरेको कामको विववरण सार्वजनिक गरिरहेका छन् । उनीहरुले आफ्नो मन्त्रालयले उल्लेखनीय काम गरेको दाबी समेत गरेका छन् ।

सत्तारुढ दलको बैठकले समेत यो सय दिनमा धेरै काम गरेको निष्कर्ष निकालेको छ । यता विपक्षी दलले भने सरकार असफल भएको भन्दै चर्को आलोचना गरेका छन् ।

बुधबार बिहान बालुवाटारमा बसेको सत्तारुढ दलको बैठकमा प्रधानमन्त्री ओलीले १०० दिनको मूल्यांकन सुनाउँदै गज्जबको काम भएको बताए ।

उनले मुख्यत: अर्थतन्त्र लयमा आउन थालेको, विपद्पछिको अवस्थामा सरकारले उल्लेख्य काम गरेको, सहकारी ठगीमा कारबाही सुरु भएको जस्ता विषय उठाउँदै सरकारको बचाउ गरेका थिए ।

प्रधानमन्त्री ओलीको दाबीमा सत्ताको मुख्य साझेदार नेपाली कांग्रेस पनि सहमत जस्तो देखिन्छ । कांग्रेसको संस्थापन इतर समूहले भने सरकारको आलोचना गरिरहेको छ ।

सभापति देउवाले बैठकमा ओलीलाई साथ दिँदै सरकारको १०० दिनको काम सन्तोषजनक नै भएको तर, विपक्षीले अनावस्यक भ्रम सिर्जना गरेको आरोप लगाएका थिए ।

बैठकमा सहभागीका अनुसार प्रधानमन्त्री ओलीको भनाईमा कांग्रेस सभापतिले समर्थन जनाउँदै अहिले नै सरकारको मुल्याङ्कन गर्ने बेला नभएको बताएका थिए ।

प्रधानमन्त्री ओलीले रवि लामिछाने पक्राउको घटनालाई पनि उपलब्धिका रुपमा व्याख्या गरेका थिए । उनले रविलाई पूर्वाग्रहका आधारमा पक्राउ गरिएको भनेर भ्रम फैलाइएको भन्दै त्यसलाई चिर्न सत्तारुढ दलको एउटै धारणा हुनुपर्ने बताएका थिए ।

सहभागीका अनुसार प्रधानमन्त्री ओलीले अब सहकारी ठगीमा संलग्न जोकोही भए पनि कारबाही गर्ने प्रतिवद्धता जनाएका थिए ।

बैठकमा गृहमन्त्री रमेश लेखकले सरकार पूर्वाग्रही नभएको बरु संसदीय छानबिन समितिको प्रतिवेदन कार्यान्वयन मात्र गरेको बताएका थिए ।

सरकारको १०० दिनका कामबारे जानकारी दिन प्रधानमन्त्री ओलीले आजै राष्ट्रका नाममा सम्बोधन गर्ने तयारी समेत गरेका छन् ।

यता विपक्षी दलले भने सरकार पूर्ण रुपमा असफल भएको आरोप लगाउँदै ज्ञापनपत्र नै बुझाएका छन् । माओवादी केन्द्र लगायतका विपक्षी दलले सरकारले १०० दिनमा उल्लेखनिय काम केही पनि गर्न नसकेको दाबी गर्दै आएका छन् ।

उनीहरुले सहकारी प्रकरणमा आफ्नालाई बचाउने र विपक्षीलाई मात्रै पेल्ने सरकारी नीति देखिएको आरोप समेत लगाएका छन् । माओवादी अध्यक्ष पुष्पकमल दाहाल प्रचण्डले देशका विभिन्न स्थानमा भएका सभामा समेत यही दोहोर्याइरहेका छन् ।

विपक्षीले बुझाएको ज्ञापनपत्रमा सरकार विपद् व्यवस्थापनमा पूर्णत असफल भएको, बाढी-पहिरो पीडितले अहिलेसम्म राहत पाउन नसकेको, सहकारी ठगीमा छानबिन र कारबाहीमा भेदभाव गरिएको, तानाशाही लाद्ने प्रयास भएको जस्ता आरोप लगाइएको छ ।

यी पनि पढ्नुहोस :

सत्तापक्षको निष्कर्ष; रास्वपाले भिड जम्मा गरेर अदालतलाई प्रभावित पार्न खोज्यो

प्रधानमन्त्रीलाई विपक्षीको ज्ञापनपत्र : तानाशाही लाद्ने प्रयास नगर्न चेतावनी (पूर्णपाठसहित)