केरूङ नाका भोलिदेखि खुल्दै, नेपाल-चीन व्यापार फेरि गतिशील बन्ला ?

रसुवा । अविरल वर्षाका कारण बन्द रहेको रसुवागढी–केरूङ अन्तर्राष्ट्रिय राजमार्गलाई सोमबारदेखि पुनः सञ्चालनमा ल्याउने तयारी गरिएको छ ।

रसुवाका प्रमुख जिल्ला अधिकारी अर्जुन पौडेलका अनुसार, लगातारको वर्षाले अवरूद्ध पारेको उक्त राजमार्ग चीनले आइतबारसम्म पुनर्निर्माण सम्पन्न गर्ने योजना बनाएको छ ।

आज आइतबार साँझसम्म सबै मर्मत कार्य पूरा गरी सोमबारदेखि यातायात सञ्चालन गरिने जानकारी चीनका समकक्षीहरूले टेलिफोनमार्फत् उपलब्ध गराएका हुन् ।

चीनको ल्हासास्थित नेपाली वाणिज्य महादूत नवराज ढकालको सहजीकरणमा सो राजमार्ग सञ्चालन कार्यलाई तीव्रता दिइएको प्रजिअ पौडेलले बताए ।

रसुवागढी केरूङ मार्ग पुनः सञ्चालनमा आएपछि नेपाल–चीन व्यापारमा पुनः सक्रियता आउने र नेपालका व्यापारीहरूलाई राहत मिल्ने अपेक्षा गरिएको छ ।

यस नाकाबाट हुने चीनबाट नेपालतर्फको मालसामान ढुवानी ठप्प भएपछि नेपाली उद्योग र व्यापारमा चुनौती थपिएको थियो ।

रसुवागढी–केरूङ खण्डअन्तर्गत ठोङ्सा नजिकको क्षेत्र वर्षाले पहिरोको चपेटामा परेको थियो। पहिरोका कारण चीनको पाखोबाट माटो बग्दै आएकोले त्यहाँको सडक क्षतिग्रस्त भएको थियो ।

यो अवरोधले रसुवाको टिमुरे क्षेत्रमा ठूला सवारीसाधनको लाम लागेको छ, जसले गर्दा आर्थिक गतिविधिमा समेत प्रभाव परेको छ ।

चीनतर्फबाट आउने मालसामान ढुवानी गर्न खटिएका सवारी साधन टिमुरे क्षेत्रमा रोकिएका छन् भने रसुवागढी क्षेत्रको व्यापारिक गतिविधि एक हप्ता यता ठप्प छ ।

यो सडकखण्ड नेपाल–चीन व्यापारका लागि एकमात्र अन्तर्राष्ट्रिय राजमार्ग हो जसबाट दुबै देशबीचको व्यापारिक आदान–प्रदानको महत्त्वपूर्ण भूमिका रहेको छ ।

यो राजमार्ग पुनः सञ्चालन भएपछि व्यापारिक गतिविधि पुनः सक्रिय भई, आर्थिक गतिविधि गतिशील बन्ने विश्वास गरिएको छ ।