प्राधिकरणलाई चुनौती- ट्रंकलाइन खपतको प्रमाण देऊ, तुरुन्तै बिल तिछौँ

बुटवल । भैरहवा करिडोरका १८ उद्योगहरूले ट्रंकलाइन र डेडिकेटेड फिडरको माग र खपत नगरेको भए पनि अन्य उद्योगसँग जोडेर आफ्नो लाइन काटिएकोमा विरोध जनाएका छन्।

नेपाल विद्युत् प्राधिकरणको नेतृत्वद्वारा आफूहरूमाथि ज्यादती गरिएको भन्दै उनीहरूले माग र खपतको प्रमाण देखाएमा तत्कालै बिल तिर्ने प्रतिवद्धता जनाएका छन्।

प्राधिकरणले ट्रंकलाइन तथा डेडिकेटेड फिडरको महसुल नतिरेको आरोपमा बिहीबार राति यी उद्योगको लाइन काटेको थियो।

प्रभावित उद्योगहरूमा पञ्चकन्या प्लास्टिक इन्डस्ट्रिज, एभरेस्ट रोलिङ मिल, लुम्बिनी फ्लोर मिल लगायत अन्य उद्योगहरू रहेका छन्। यस घटनाले करिब तीन हजार कर्मचारीको रोजगारीमा असर परेको छ।

पञ्चकन्या समूहका महाप्रबन्धक देवेंद्र साहूका अनुसार यी उद्योगहरूले कुनै निवेदन नदिई ट्रंकलाइनबाट आपूर्ति लिएको आरोप लगाइयो, जुन गलत हो।

उनले भने, “ट्रंकलाइन प्रयोग गरेको प्रमाण देखाए हामी बिल तिर्न तयार छौं। तर, प्राधिकरणले अन्य उद्योगसँग तुलना गरेर हामीलाई फसाएको छ।”

उद्योगीहरूले चार वर्षदेखि ट्रंकलाइन मुद्दामा आवाज उठाउँदै आएका छन्, तर प्राधिकरणले आफूहरूलाई अन्यत्रका उद्योगसँग जोडेर अन्याय गरिरहेको बताएका छन्। उद्योगीहरूले विभिन्न मुद्दाहरूलाई एकैसाथ राखेर समस्या समाधान गर्नुको सट्टा झन् विवादलाई बल दिएको गुनासो गरेका छन्।

यस विषयमा प्राधिकरणका विभिन्न अधिकारीहरूलाई समेटेर अध्ययन गर्न समितिहरू गठन भए पनि ठोस समाधान हुन नसकेको उद्योगहरूको भनाइ छ।