अमोरिम अब युनाइटेडको प्रशिक्षक

लन्डन– रुबेन अमोरिम शुक्रबार म्यानचेस्टर युनाइटेडको नयाँ प्रशिक्षक नियुक्त भएका छन् । उनले पदमुक्त गरिएका एरिक टेन हागको स्थान शुक्रबार लिएका हुन् ।

३९ वर्षीय पोर्चुगल प्रशिक्षकले स्पोर्टिङ्ग लिस्बनका लागि दुईवटा प्रिमेइरा लिगका उपाधि जितेका थिए । उनले क्लबसँग सन् २०२७ सम्म सम्झौता गरेका छन् । उनी नोभेम्बर ११ मा क्लबमा सामेल हुनेछन् ।

‘म्यानचेस्टर युनाइटेड रुबेन अमोरिमलाई टोलीको मुख्य प्रशिक्षकको रूपमा नियुक्त गर्न उत्सुक छ,’ क्लबले आफ्नो वेबसाइटमा भनेको छ, ‘उहाँ जुन २०२७ सम्म रहनुहुनेछ र उहाँले आफ्नो वर्तमान क्लबप्रति आफ्नो दायित्व पूरा गरेपछि क्लबसँग एक अतिरिक्त वर्षको विकल्प रहनेछ ।’

युनाइटेडले अमोरिमलाई ‘युरोपेली फुटबलमा सबैभन्दा रोमाञ्चक र उच्च मूल्याङ्कन भएका युवा प्रशिक्षकमध्ये एक’का रूपमा वर्णन गरेको छ ।

अमोरिम ओल्ड ट्राफोर्डमा नआउञ्जेल रुड भ्यान निस्टेलरोयले टोलीको नेतृत्व गर्न जारी राख्नेछन् ।

प्रिमियर लिगमा १४औँ स्थानमा रहेको युनाइटेड वेस्टहामसँग २–१ ले पराजित भएपछि क्लबले सोमबार टेन हागलाई बर्खास्त गरेको थियो । हागले पछिल्ला नौ खेलमा मात्र तीन जीत हासिल गरेका थिए ।